KA
Gergeti Trinity Church

გერგეტის სამება

თუკი საქართველოს ჩრდილოეთიდან ესტუმრები და ლარსის საზღვრით შემოხვალ, გზად დარიალის ულამაზეს ხეობას ამოუყვები და რამდენიმე წუთში დაბა სტეფანწმინდაში (ყაზბეგში) აღმოჩნდები. აქ მყინვარწვერს რომ ახედავ, ამ თეთრი გოლიათის ფონზე გუმბათიან ეკლესიას დაინახავ - ეს გერგეტის სამებაა, ქართული ხუროთმოძღვრების გამორჩეული ძეგლი, რომელიც XIV საუკუნეშია აგებული.
რეგიონი
მცხეთა-მთიანეთი
ქალაქი
სტეფანწმინდა

როგორ მოვხვდეთ გერგეტის სამებასთან

ტაძრამდე მოასფალტებული, სამანქანო გზა მიდის, რომელსაც ფეხით 30-40 წუთში დაფარავ და ზღვის დონიდან 2200 მეტრზე აღმოჩნდები.  

გერგეტის სამების არქიტექტურა და მხატვრობა 

გერგეტის ყოვლადწმინდა სამების ტაძარი ქართული ხუროთმოძღვრების გამორჩეული ნიმუშია - გულუბრყვილო უშუალობით შესრულებული მორთულობითა და საოცარი გარემოთი დაუვიწყარ შთაბეჭდილებას ქმნის.

ტაძრის გვერდით სამრეკლოა, ტაძრის სამხრეთ ფასადზე კი მიშენებულია საბჭო, ანუ სათათბირო, სადაც ხევის უხუცესები მნიშვნელოვანი საკითხების გადასაწყვეტად იკრიბებოდნენ. 

გალავნით შემოზღუდული ტაძარი ორსართულიანია. მეორე სართული, რომელიც უცხო თვალისთვის შეუმჩნეველია, სამალავი იყო.  წერილობითი წყაროს თანახმად, შუა საუკუნეების სახიფათო წლებში ქართველები მტრისგან სწორედ გერგეტის ტაძარში იცავდნენ წმინდა ნინოს ჯვარსა და სამეფო საგანძურს, რომელიც ახლა თბილისში, სიონის ტაძარში ინახება.

ტაძარში განსაკუთრებით საინტერესოა XVI საუკუნის მხატვრობა - ღვთისმშობლის, მაცხოვრის, იოანე ნათლისმცემლისა და წმინდა ნინოს გამოსახულებებით, ასევე ორი საკმაოდ ძველი ხატი - „საავდრო“ და „სადარო“. 

ყოველ 16 ივლისს აქ გერგეტობა აღინიშნება, თბილისიდან სიონის ტაძრის ღვთისმშობლის დიდ ხატს ჩამოაბრძანებენ ხოლმე, ტაძარი ხალხით ივსება და ღამისთევის რიტუალი წირვა-ლოცვისა და გალობის თანხლებით აღესრულება.

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა