KA
Vani Archaeological Site

ვანის არქეოლოგიური ძეგლი

ვანის ნაქალაქარი იმერეთში, ქალაქ ვანში, შემაღლებულ ადგილზე მდებარეობს და ის იუნესკოს მსოფლიო მემკვიდრეობის საცდელ სიაში შეტანილი, მსოფლიო მნიშვნელობის არქეოლოგიურ ძეგლად აღიარებული, ოქროს ანტიკური ქალაქია.
რეგიონი
იმერეთი
ქალაქი
ვანი

ვანის ნაქალაქარის ისტორიული წარსული

ბორცვებზე სამ ტერასად აღმოჩენილმა რვასაუკუნოვანმა ცივილიზაციამ, რკინის ხანიდან  ელინისტური ეპოქის ჩათვლით, მწერლებისა და პოეტების მუზა - მითი არგონავტების შესახებ რეალობად აქცია და ოქროთი მდიდარი ქალაქ-სახელმწიფოს, კოლხეთის სამეფოს არსებობა საბოლოოდ დაადასტურა.

ნაქალაქარზე მოპოვებული უძველესი არქეოლოგიური მასალა ძვ. წ. VIII-VI საუკუნეებით თარიღდება და კერამიკული ფრაგმენტებითაა წარმოდგენილი. მეორე ეტაპს, ძვ. წ. VI-IV საუკუნეებს, როდესაც ვანი კოლხეთის სამეფოს ერთ-ერთი პოლიტიკურ-ადმინისტრაციული ცენტრი იყო, კოლხური ოქრომჭედლობის ნიმუშები წარმოადგენს - დიადემები, საყურეები, სასაფეთქლეები, სამაჯურები, აგრეთვე, ვერცხლის სამკაულები და ბრინჯაოს ქანდაკებები.

რა დანიშნულება ჰქონდა ვანს?

ძვ. წ. III-I საუკუნეებში ვანს მოიხსენიებენ, როგორც დიდ სატაძრო ცენტრს. ამ პერიოდს განეკუთვნება საკულტო კომპლექსი, რომლის გათხრების შედეგადაც აღმოჩენილია მთელი რიგი საკულტო-სარიტუალო ატრიბუტიკა: ბრინჯაოს ქანდაკებები და ნიღბები, ასევე, ადგილობრივი და ბერძნული კერამიკა.

მტრების შემოტევების შემდეგ, ძვ. წ. I საუკუნეში ძველი ვანი, მისი ცივილიზაცია მთლიანად განადგურდა, თუმცა მისი ისტორია უმდიდრეს არტეფაქტებად შემოგვრჩა.

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა