კონსტანტინე გამსახურდიას სახლ-მუზეუმი

რას ნახავ კონსტანტინე გამსახურდიას სახლ-მუზეუმში?

კონსტანტინე გამსახურდია აქტიურად მონაწილეობდა ევროპაში ჩამოყალიბებული „საქართველოს განმათავისუფლებელი კომიტეტის“ მუშაობაში და ეროვნული მოღვაწეობისათვის საბჭოთა რეჟიმის დროს მრავალგზის იყო რეპრესირებული.

საქართველოს ეროვნულ-განმათავისუფლებელი მოძრაობის ერთ-ერთი ლიდერი (1973-90წწ) და საქართველოს პირველი პრეზიდენტი გახლდათ კონსტანტინე გამსახურდიას ვაჟი ზვიად გამსახურდია (1991-1992 წწ). 

კონსტანტინე გამსახურდიას, გარდა მნიშვნელოვანი პროზაული და პუბლიცისტური შემოქმედებისა, უდიდესი წვლილი აქვს მთარგმნელობითი ხელოვნების განვითარებაში. კონსტანტინე გამსახურდიამ თარგმნა ქართულად გოეთეს „ახალგაზრდა ვერთერის ვნებანი“, დანტე ალიგიერის „ღვთაებრივი კომედია“, უოლტ უიტმენის პოეზია და სხვა.

მწერლის მშობლიურ სახლში სახლ-მუზეუმი 1987 წელს გაიხსნა. ეზოში შენარჩუნებულია მეგრული ყოფისთვის დამახასიათებელი გარემო. აქ ინახება მწერლისეული ნივთები, ცხოვრებისა და შემოქმედების ამსახველი ფოტოსურათები, ასევე სხვადასხვა ენაზე გამოცემული ნაწარმოებები. 

დღეს სახლ-მუზეუმის ირგვლივ დასასვენებელი სივრცეა მოწყობილი; ამ სიმწვანეში ინტერნეტიც არის და შეგიძლია, პირდაპირ დიდი კლასიკოსის სახლის ეზოდან იმუშაო.

ყოველწლიურად, 15 მაისს, მწერალ-აკადემიკოს კონსტანტინე გამსახურდიას დაბადების დღეზე სახალხო დღესასწაული „კონსტანტინეობა“ იმართება.