ქუთაისის ბოტანიკური ბაღი

ქუთაისის ბოტანიკური ბაღი 1969 წელს შოტლანდიელი აგრონომისა და მრეწველის, იაკობ მარის ხელმძღვანელობით დაარსდა. მაშინ ბაღში ისეთი ეგზოტიკური ხეები მოაშენეს, როგორებიცაა მაგნოლია და კორპის მუხა. ამ დროისთვის ქუთაისის ბოტანიკური ბაღის დენდროფლორა ასეულობით სახეობას მოიცავს.

ქუთაისის ბოტანიკური ბაღის ყველაზე ცნობილი ადგილი 400 წლის მუხის ღეროში გახსნილი სამლოცველოა. 45 მეტრი სიმაღლისა და 2 მეტრი დიამეტრის მუხის ღეროში ღრუ XX საუკუნის შუა წლებში გაჩნდა. მასში სამლოცველოს გახსნის იდეა ბაღის დირექტორს ეკუთვნის, მისი განხორციელება კი 2014 წლის იანვარში საქართველოს მართლმადიდებელი ეკლესიის კურთხევით გახდა შესაძლებელი. სამლოცველოში, სადაც ქუთაისელების მიერ მიტანილი ხატებია, სამი ადამიანი ეტევა. 

ბოლო წლებში ქუთაისის ბოტანიკური ბაღი საგრძნობლად შეიცვალა - რამდენიმე ხელოვნური აუზი, შადრევანი, ქვაფენილით მოპირკეთებული ბილიკი გაჩნდა. ბაღის ტერიტორიაზე აშენდა ამფითეატრი, სადაც ხშირად იმართება ადგილობრივი ჯგუფების კონცერტები, წარმოდგენები და ფილმების ჩვენება.