ბათუმის სინაგოგა

სად მდებარეობს ბათუმის სინაგოგა?

ბათუმში, ვაჟა-ფშაველას ქუჩაზე, ერთ მდიდრულ, მაღალ შენობას იხილავ, სადაც ჭედური ორნამენტებით გაწყობილი რკინის გალავნის მიღმა მოჩუქურთმებული ნაგებობა მოჩანს - ხის კარითა და სიმეტრიულად ჩაწყობილი მრგვალი და ოვალური ფანჯრებით. ეს ბათუმის სინაგოგაა, რომელსაც „აშქენაზის“ ქვიან სინაგოგასაც უწოდებენ.

ბათუმის სინაგოგის ისტორია

ბათუმის სინაგოგა ამსტერდამისა და ჰააგის სინაგოგების მსგავსია და 1904 წელს ბათუმელი არქიტექტორის, სიმონ ვოლკოვიჩის პროექტის მიხედვით აშენდა.  

შენობის აგების ნებართვა XX საუკუნის დასაწყისში რუსეთის იმპერატორმა ნიკოლოზ მეორემ გასცა, როცა ადგილობრივმა ებრაელებმა მას პეტიციით მიმართეს. აშენებიდან მალევე, 30-იანი წლების შემდეგ, საბჭოთა ხელისუფლების ბრძანებით სინაგოგა, ისევე, როგორც სხვა რელიგიების სალოცავები, დაიკეტა. 

კომუნისტების მმართველობის პერიოდში სინაგოგის შენობაში სპორტულმა საზოგადოება „სპარტაკმა“, ტანვარჯიშისა და ფარიკაობის კლუბებმა დაიდო ბინა. საბჭოთა კავშირის დაშლის შემდეგ კი, 1992 წელს, შენობა ებრაელებს დაუბრუნეს და სინაგოგამ პირვანდელი დანიშნულება აღიდგინა.