იხვის კერძები

იხვის არაერთი ეგზოტიკური რეცეპტი არსებობს, თუმცა იხვის ჩახოხბილი განსაკუთრებულია. იხვს ცხიმიანი და გემრიელი ხორცი აქვს, ამიტომაც იხვის კერძები საუკეთესო საგემოვნო თვისებებით გამოირჩევა. წვნიანი მუქი ფერის გამოდის და მას შავ ხარჩოსაც ეძახიან.

როგორ მზადდება იხვის ჩახოხბილი?

იხვი, რომლითაც ჩახოხბილი მზადდება, შეიძლება იყოს როგორც შინაური, ისე გარეული, ნანადირევი. კარგად გასუფთავებული და გარეცხილი იხვი უნდა დავჭრათ და თუჯის ქვაბში ჩავყაროთ. დავასხათ მდუღარე წყალი ისე, რომ ხორცი კარგად დაიფაროს. 

იხვის ხორცს, სხვა ფრინველისგან განსხვავებით, მაგარი ხორცი აქვს და მოსახარშად მეტი დრო სჭირდება. ადუღებისას უნდა მოვქაფოთ. ხორცი რომ შერბილდება, ამოვიღოთ, ნახარშს ცხიმი მოვხადოთ და შიგ წვრილად დაჭრილი ხახვი და ხორცი ერთად მოვშუშოთ. ხორცმა და ხახვმა ერთნაირი ოქროსფერი უნდა მიიღოს. 

გაგრილებულ ნახარშში გავხსნათ გატარებული ან დანაყილი ნიგოზი, ნიორი, წიწაკა, ზაფრანა, უცხო სუნელი, ნედლი ქინძი და მარილი. იხვის ჩახოხბილს ძალიან უხდება კვაწარახი, რომელიც ნელ-ნელა უნდა ჩავასხათ ხორციან ქვაბში. სასურველი სისქის მისაღებად შეგვიძლია, მდუღარე წყალი დავუმატოთ და 15 წუთი ნელ ცეცხლზე ვადუღოთ. 

ასეთი  რეცეპტით მომზადებული იხვი განსაკუთრებით დასავლეთ საქართველოში უყვართ და ღომთან ერთად მიირთმევენ. 

იხვის ჩახოხბილისთვის საჭიროა:

• იხვი - 1 ცალი (1,5 კგ)

• ნიგოზი - 400 გრ

• ხახვი - 2-3 თავი

• უცხო სუნელი - ერთი ჩ/კ

• ნედლი ქინძი - 1 კონა 

• ზაფრანა - 1 ჩ/კ

• კვაწარახი - ერთი ჩ/კ ან ტომატი - 1 ს/კ

• ნიორი - 3-4 კბილი

• მარილი და წიწაკა - გემოვნებით

იხვის სხვა კერძები

იხვს საოჯახო მეურნეობაში საქართველოს სხვა კუთხეებშიც ამრავლებენ. მესხეთში იხვის აპოხტსაც აკეთებენ. ესაა წინასწარ დამარილებული და გამშრალი ფრინველი, რომლის მომზადების განსაკუთრებული წესები არსებობს და, ბატის აპოხტთან ერთად, ამ მხარეში ძალიან პოპულარულია. 

დედაქალაქში, და არამარტო, იხვს ბრინჯისა და სტაფილოს სატენით აკეთებენ. კარგად გარეცხილ, გასუფთავებულ ფრინველს მუცელს ამოუვსებენ ნახევრად მოხარშული ბრინჯით, დაჭრილი სტაფილოთი, წითელი ბულგარული წიწაკით, შავი პილპილითა და მარილით შეზავებული სატენით, მუცლის ქვედა, ღია ნაწილს ამოუკერავენ, შუაზე გაჭრილ კარტოფილს შემოულაგებენ და ცხელ ღუმელში კარგად დაბრაწავენ. დროდადრო ცხიმს გადაუსვამენ, რომ ერთნაირად შეწითლდეს. 

ფარშში ხშირად იყენებენ სოკოსაც, რადგან იხვის ხორცთან სოკო და კარტოფილი განუმეორებელ გემოს ქმნის. წინასწარ გასათვალისწინებელია, რომ, თუკი იხვის მომზადებას სატენით აპირებ, ფრინველი ახალგაზრდა უნდა იყოს, ადვილად რომ შეიბრაწოს. სხვა შემთხვევაში, ის წინასწარ მრგვლად უნდა მოიხარშოს.

კიდევ ერთი საინტერესო კერძია იხვის ტოლმა. ძვლებგამოცლილ იხვს პატარ-პატარა ნაჭრებად აქუცმაცებენ, ბლომად ხახვთან და ოხრახუშთან ერთად მოშუშავენ, დაუმატებენ ხმელ ქინძს, ნიორს, წიწაკას, ნახევრად მოხარშულ ბრინჯს (ეს კერძი ბრინჯის გარეშეც კეთდება), თხელფურცლიან კომბოსტოში გადაახვევენ, მჭიდროდ ჩააწყობენ ქვაბში, ჩააყოლებენ პომიდვრისა და კომშის ნაჭრებს და დაბალ ცეცხლზე მოხარშავენ. 

თუკი, ზოგადად, ტოლმას სხვადასხვა ქვეყნის სამზარეულოში შეხვდები, იხვის ტოლმა ახალი ქართული სამზარეულოს ნამდვილი წარმომადგენელია.