კაიაკინგი აჭარისწყალზე

მდინარის სირთულის კატეგორია

მდინარე აჭარისწყლის სირთულის კატეგორიაა 3-4.

ადგილმდებარეობა

აჭარისწყალზე კაიაკის მარშრუტი ხულოს კანიონს გაივლის. ხულო აჭარის მაღალმთიანი რეგიონია. ის ზღვის დონიდან 930 მ-ზე მდებარეობს და ქალაქ ბათუმიდან 88 კმ-ითაა დაშორებული. 

მდინარე

მდინარე აჭარისწყალი არსიანის ქედზე იღებს სათავეს, რომლის სიმაღლე ზღვის დონიდან 2000-2500 მ-ია. მდინარის სიგრძე 90 კმ-ია; აჭარისწყალზე რამდენიმე ჰიდროელექტროსადგურია აშენებული, მათზეა დამოკიდებული მდინარის წყალუხვობა. 

მარშრუტი

პირველი სექცია იწყება სოფელ დიაკონიძეებთან, ზღვის დონიდან 800 მ-ზე და სრულდება მდინარე აჭარისწყლისა და მდინარე სხალთის შესართავთან, ზღვის დონიდან 710 მ-ზე;

პირველი სექციის სიგრძე 3 კმ-ია, ვერტიკალური ვარდნის სიმაღლე - 90 მ, სირთულის კატეგორია - 4 (უკიდურესად რთული, გრძელი და რთული რეპიდები, ციცაბო ვარდნები, დიდი ქვები);

მეორე სექცია იწყება სოფელ ჩაოსთან, ზღვის დონიდან 580 მ-ზე და სრულდება სოფელ შუახევში, ზღვის დონიდან 440 მ-ზე. მარშრუტს სამანქანო გზა მიუყვება.

მეორე სექციის სიგრძე 8 კმ-ია, ვერტიკალური ვარდნის სიმაღლე - 140 მ, სირთულის კატეგორია 3-3+ (რთული,  მაღალი და არარეგულარული ტალღები, კლდეები და მორევები, გამჭვირვალე, მაგრამ ვიწრო გასასვლელები);

მესამე სექცია იწყება სოფელ დანდალოსთან, ზღვის დონიდან 320 მ-ზე  და სრულდება სოფელ გობრონეთთან, ზღვის დონიდან 260 მ-ზე. 

მესამე სექციის სიგრძე 7 კმ-ია, ვერტიკალური ვარდნის სიმაღლე - 60 მ, სირთულის კატეგორია - 3 (რთული, მაღალი და არარეგულარული ტალღები, კლდეები და მორევები, გამჭვირვალე, მაგრამ ვიწრო გასასვლელები);

მარშრუტის სეზონურობა

მდინარე აჭარისწყალზე კაიაკინგი შესაძლებელია აპრილიდან ივნისამდე და ოქტომბერში. 

მეორე და მესამე სექციაზე - მარტიდან ივნისის დასაწყისის ჩათვლით, ოქტომბრის ბოლოდან ნოემბრის დასაწყისის ჩათვლით.

როგორ მივიდეთ სასტარტო ადგილას

სოფელ დიაკონიძეებში დაბა ხულოდან მაღალი გამავლობის ავტომობილით მიხვალ. მანძილი 4 კმ-ია.

უსაფრთხოება 

კაიაკით დასაშვებად აუცილებელია გამოცდილება. 

რეკომენდებულია, მდინარე ადგილობრივ კაიაკერთან ერთად გაიარო ან მისგან მიიღო საჭირო ინფორმაცია. ტურის დასაჯავშნად წინასწარ დაუკავშირდი კომპანიას. 

კაიაკინგში  მონაწილეობისთვის მინიმალური ასაკია 18 წელი.