სიღნაღის ციხე-გალავანი

სიღნაღის ციხე-გალავნის სტრუქტურა

ქვით ნაგები გალავნის სიგრძე 4 კილომეტრს აღწევს, კედლების ფართობი კი თითქმის 40 ჰექტარია.

გალავანი ლანდშაფტის რთულ რელიეფს მიუყვება. ამ ნიშნით ტურისტები სიღნაღის ციხეს ხშირად ადარებენ ჩინეთის დიდ კედელს, რომელიც, ასევე, რელიეფის რთულ ფორმებს იმეორებს.

გალავანს 6 თაღოვანი კარიბჭე და 23 საბრძოლო კოშკი ჰქონდა, კოშკების მეტი ნაწილი ორსართულიანია - ზემოდან საბრძოლო ბანით. გალავანს მთელ სიგრძეზე საბრძოლო ბილიკი გასდევს, საიდანაც ხელისგულზე მოჩანს ულამაზესი სიღნაღი, ალაზნის ველი და კავკასიონი. 

გალავნის ყველაზე დიდ კოშკში, რომელსაც „მეფის ან ქიზიყის ბურჯს“ უწოდებენ, ჩაშენებულია წმინდა სტეფანეს სახელობის ეკლესია. ის ერეკლე II-ის საყვარელი ეკლესია ყოფილა. შესაძლოა იმიტომ, რომ მისი შიდა სივრცე ისეთივე მოკრძალებულია, როგორიც თავად მეფე ერეკლე იყო.

ქალაქ სიღნაღის სახელწოდება თურქულ ენაზე თავშესაფარს ნიშნავს. მართლაც, ქალაქი მეფე ერეკლემ ძლიერ ფორპოსტად აქცია, რომელსაც მტრის შემოსევის დროს მიმდებარე სოფლების მოსახლეობა აფარებდა თავს.