ფარავნის ტბა - საუკეთესო ადგილი თევზაობისთვის

გაყინული ტბა საოცარი სანახავია - ზამთარში აქაურობა თეთრ უდაბნოს ემსგავსება, ზაფხული უკვე კემპინგის სეზონია - ამისთვის ტბის ირგვლივ საუცხოო ადგილებია. თუ თევზაობაც გიყვარს, ჩათვალე, რომ ზღაპარში მოხვდი - ფარავნის ტბა მეთევზეების საყვარელი ადგილია, ამ წყალში ბინადრობს ხრამული (Capoeta sieboldii), კალმახი (Salmo faria Linne), ნაფოტა (Rutilus), კობრი (Cyprinus carpio) და ჭაფალა (Coregonus albula).

ზამთარში სათევზაო თვე დეკემბერია - ამ დროს ტბა ახალი გაყინულია; გაზაფხულზე კი თევზაობის სეზონი აპრილში განახლდება ხოლმე, მაშინ როდესაც სქელი ყინული დნობას დაიწყებს.

დიდი ფართობის მიუხედავად, ტბის მაქსიმალური სიღრმე მხოლოდ 3,3 მეტრია. წყალი სხვადასხვა დროს სხვადასხვა ფერია, რაც ამინდის ცვლილებაზეა დამოკიდებული.  

ტბის სამხრეთ ნაწილიდან სათავეს იღებს მდინარე ფარავანი, რომელიც შემდეგ მტკვარს უერთდება. 

ფარავნის ტბის ირგვლივ 6 სოფელია გაშენებული: ფარავანი, ასფარა, ვლადიმიროვკა, ტამბოვკა, ახალი ხულგუმო და ფოკა.