ქუთაისი, ტიციან ტაბიძის ქ. N27

შენობის ისტორია

ქუთაისის გამორჩეულ შენობათა რიგს ტიციან ტაბიძის ქუჩის N27-ში მდებარე საცხოვრებელი სახლი მიეკუთვნება, რომელიც 1882 წელს , ევგენია იურჩენკო-პრინცის დაკვეთით აშენდა. 

მთავარი ფასადი მორკალული თავსართითა და ნეობაროკული ფრონტონით სრულდება, რომლის შუაშიც უწინ საათი იყო ჩასმული. ფასადის დეკორში კარგად ჩანს მეპატრონის ინიციალები -  „ეპ“. 

1885 წლიდან სახლი რუსეთის იმპერატორ ალექსანდრე I-ის დის, ეკატერინეს შვილიშვილის, კონსტანტინე ოლდენბურგის (1850-1906)  საკუთრება ხდება. მან შენობა გააფართოვა, ორსართულიანი ფლიგელი მიაშენა და სანქტ-პეტერბურგში გადასვლამდე, 1896 წლამდე, აქ ცხოვრობდა ოჯახთან ერთად.   

ოლდენბურგის შემდეგ მის სახლში ჯერ ქუთაისის გუბერნატორმა დაიდო ბინა, საქართველოს ხანმოკლე დამოუკიდებლობის პერიოდში, 1920-1921 წლებში კი, სხვადასხვა ორგანიზაციებთან ერთად, აქ   ქუთაისის მუზეუმი და საისტორიო-საეთნოგრაფიო საზოგადოება იყო განთავსებული. 

ბოლშევიკების ექსპანსიის შემდეგ, 1921 წლიდან, შენობა საბჭოთა უშიშროების განყოფილებამ დაიკავა. 

შენობა დღეს

დღეს ამ შენობის ბინადარი ერთ-ერთი სახელმწიფო უწყების ოფისია.