წვირმის მთავარანგელოზის ტაძარი

ტაძარი აშენებულია შირმისა და ფიქლის შერეული წყობით, კირის დუღაბზე. პირველი სართული XIII საუკუნეშია აგებული, მეორე სართული კი XIV საუკუნით თარიღდება.

ეკლესიაში შესასვლელი დასავლეთიდანაა. ტაძრის ქვედა ნაწილის ინტერიერში კარგადაა დაცული XIII საუკუნის ფრესკები. საკურთხეველი, დარბაზის იატაკთან შედარებით, ერთი საფეხურითაა ამაღლებული და ხის ორნამენტირებული კანკელითაა გამოყოფილი. მეორე სართულზე ასვლა დასავლეთის მხრიდან არის შესაძლებელი.

ტაძრის ფასადი შელესილი უნდა ყოფილიყო, თუმცა ნალესების კვალი დღეს თითქმის აღარ იკითხება.