არხოტი-ტანიეს ხეობა-ტანიეს ტბა-ქისტანი

დღე I: სოფელი ახიელი-ტანიეს ტბა

მარშრუტი არხოტის ხეობის სოფელ ახიელიდან იწყება, რომელიც ზღვის დონიდან 1800 მ-ზე მდებარეობს. აქედან  მდინარე ასას ხეობას გაუყვები და 3 კმ-ში სოფელ ამღასთან მიხვალ, რომლის სიმაღლე ზღვის დონიდან 1720 მეტრია. ამღა არხოტის ხეობის ბოლო ქართული სოფელია - აქედან ინგუშეთის უახლოეს დასახლებულ პუნქტამდე 18-20 კმ-ია. 

დაახლოებით 1.5 კმ-ში მდინარე ასას ხეობაში ჩადიხარ, ბილიკი თანდათან ვიწროვდება და კანიონში შედის, სადაც გზად მდინარე უნდა გადაკვეთო და მის მარჯვენა სანაპიროს გაუყვე. 

აქედან 3 კმ-ში მდინარე ასას მარჯვენა შენაკადი უერთდება - მდინარე ტანიესწყალი. ის საკმაოდ ღრმაა და გარკვეულ ადგილებში მისი გადავლაც მოგიწევს. 

12 კმ-ის გავლის შემდეგ საქართველოს სასაზღვრო პოლიციის პუნქტთან მიხვალ.  აუცილებელია, რეგისტრაცია გაიარო, რადგან იქვე ახლოს რუსეთის (ინგუშეთის) საზღვარია. შემდეგ შეგიძლია აქვე დაბანაკდე ან ტანიეს ტბის მიმართულებით გააგრძელო გზა - ტბამდე დაახლოებით 6 კმ-ია. 

გულის ფორმის ულამაზეს, კამკამა ტბასთან, რომელიც ზღვის დონიდან დაახლოებით 2232 მეტრ სიმაღლეზეა, შესანიშნავი საკემპინგო ადგილებია. ტბაში გაგრილებაც შეიძლება, თუ ამ ცივ წყალს გაუძლებ.

დღე II: ტანიეს ტბა-კისტანი

ტანიეს ტბიდან ხეობას ზემოთ, ტანიეს უღელტეხილისკენ გაუყვები და საკვანძო გზაგასაყარზე აღმოჩნდები. სამხრეთისკენ არ უნდა წახვიდე, გზა ქვემოთ, სოფელ უკანხადუს მიმართულებით უნდა გააგრძელო. 

დაახლოებით 1.5 კმ-ის შემდეგ აღმოსავლეთის მიმართულებით ფერდობზე გადაუხვევ. ქვემოთ არ ჩახვიდე - ფერდობს გაუყევი, სანამ ქედზე არ გადახვალ.
ქედზე 1 კმ-ის გავლის შემდეგ ქედების შესაყარს მიადგები. გეზი აღმოსავლეთით აიღე და მარცხნივ არსებულ ქედს გაუყევი.
3 კმ-ის შემდეგ კვლავ ქედების გზაგასაყარია და კვლავ მარცხნივ გააგრძელე გზა.  ქედიდან კისტანის ციხეებს დაინახავ. 2 კმ-ს რომ გაივლი, ქედის მარჯვნივ ხეობაში დაეშვები, სოფელ კისტანთან, კისტანის ციხეების მარჯვნივ  ჩახვალ და გზისპირზე აღმოჩნდები. 

კისტანს (ზღვის დონიდან 2080 მ) ციხე-ქალაქსაც უწოდებენ. აქ ფეოდალური ხანის 30-ამდე ციხეა, რომლებსაც როგორც თავდაცვითი, ისე საცხოვრებლის ფუნქცია ჰქონდა. ერთმანეთზე მჭიდროდ მიჯრილი ციხე-სახლები და მათ უკან ცამდე აზიდული მთები საოცარი სანახავია.

კისტანიდან შეგიძლია, მანქანით გააგრძელო გზა შატილისკენ ან ბარში დაბრუნდე ბარისახოს მიმართულებით.