„ბლექ სი არენა"

„ბლექ სი არენას“ არქიტექტურა

Black Sea Arena შავი ზღვის სანაპიროზე, კურორტ შეკვეთილთან მდებარეობს. 

შენობის არქიტექტურა და დიზაინი გერმანულ კომპანია Drei Architekten-ს ეკუთვნის. 

Black Sea Arena 2020 წელს „გერმანული დიზაინის დაჯილდოების“ გამარჯვებულიც გახდა საუკეთესო თანამედროვე არქიტექტურის კატეგორიაში.

ამფითეატრის ტიპის ღია საკონცერტო დარბაზი ულტრათანამედროვე ტექნიკით არის აღჭურვილი. დარბაზს მოძრავი სახურავი აქვს, რომელიც ამინდზეა მორგებული - კარგ ამინდში აქ მუსიკის ფონზე ვარსკვლავებით მოჭედილი ცის ცქერა შეგიძლია. ღამით, როდესაც ფერადი განათება ირთვება, საკონცერტო დარბაზის შენობა ზღაპრულ ხომალდს ემსგავსება.

რატომ უნდა ეწვიო „ბლექ სი არენას“?

Black Sea Arena ოფიციალურად 2016 წლის 30 ივლისს კრისტინა აგილერას კონცერტით გაიხსნა. მას შემდეგ ამ სცენაზე არაერთი ლეგენდარული შემსრულებელი გამოსულა: ვანესა მეი, ჯიბსი კინგი, ენიო მორიკონე, ელტონ ჯონი, ჯესი ჯეი, ჯგუფი „სკორპიონი“, ჯგუფი „აეროსმიტი“, რობერტ პლანტი... 

2018 წელს Black Sea Arena-ზე საოპერო წარმოდგენა დაიდგა - ამ სცენაზე ვერონის ოპერის თეატრმა „აიდა“ შეასრულა.   

„ბლექ სი არენას“ სცენაზე ხშირად იმართება ქართველი შემსრულებლების, მომღერლებისა და საცეკვაო ანსამბლების კონცერტები.

როცა Black Sea Arena-ს ბილეთებს შეიძენ, გირჩევ, ადრე მიხვიდე და კონცერტის დაწყებამდე იმ ზღაპრულ ბაღში გაისეირნო, რომელიც შენობის გარშემოა გაშენებული. ევკალიპტების ხეივანი, მომღერალი შადრევანი და უნიკალური „მუსიკოსების პარკი“ სწორედ იმ განწყობას შეგიქმნის, რომელიც ჯადოსნური მუსიკის მოსმენას სჭირდება.

როგორც დარბაზი, ისე მთელი სივრცე ნებისმიერი ადამიანის საჭიროებებზეა მორგებული; დარბაზის გვერდით დიდ ფართობზე უფასო ავტოსადგომია; Black Sea Arena-ზე მაყურებელთა უსაფრთხოება უმაღლესი სტანდარტებით არის დაცული.