ჯუთა - ჭიუხის მასივი

როგორ უნდა მოხვდე ჯუთაში?

თბილისიდან სტეფანწმინდისკენ მიმავალ გზაზე, დაახლოებით 120 კილომეტრში შეგხვდება სნოს ხეობის გადასახვევი, საიდანაც ჯერ სოფელ სნოში შეხვალ, შემდეგ კი მაღლა, მთებში, ზღვის დონიდან 2200 მეტრზე შეფენილ პატარა სოფელ ჯუთაში მოხვდები.

ზამთარში აქ რამდენიმე ოჯახი რჩება, ზაფხული კი ხალხმრავალია - ბარიდან ადგილობრივებიც ადიან და ტურისტიც ბევრი სტუმრობს. 

ჯუთა ხეობის ბოლო სოფელია, საიდანაც საფეხმავლო ბილიკი ჭიუხის (ჭაუხის) მასივისკენ წაგიყვანთ – ალესილი კლდისკენ, რომელიც ერთი შეხედვით მიუვალად მოგეჩვენებათ, თუმცა საუკეთესო ადგილია როგორც დამწყები, ასევე პროფესიონალი მთამსვლელებისთვის.

მასივს რამდენიმე, 3500 მეტრზე მაღალი მწვერვალი აქვს, რომლებზეც სხვადასხვა კატეგორიისა და სირთულის მარშრუტები ადის. 

თუმცა, ეს იმას არ ნიშნავს, რომ ჭიუხი მხოლოდ მთამსვლელებისთვისაა, ჯუთადან ჭიუხის მასივის ძირთან 4 კილომეტრიანი, მარტივი სალაშქრო ბილიკი მიდის, რომლის გავლასაც 1,5 საათი სჭირდება. ბილიკზე შეგხვდებათ ყინულივით ცივი ჯუთის ტბაც.