ბათუმის კათოლიკური ეკლესია
გოტიკური არქიტექტურის ეს ნიმუში მეოცე საუკუნის მიწურულს აშენებული ბათუმის სულიწმიდის სახელობის კათოლიკური ეკლესიაა.
შენობა გიგანტური ვიტრაჟებითა და ნათელი ინტერიერით ბრაზილიელი არქიტექტორის, ოსკარ ნემეირის მოდერნისტულ ტაძრებს მოგაგონებს, რომლებიც მრავლადაა სამხრეთ ამერიკაში, თუმცა ეს ტაძარი ბათუმელმა კათოლიკეებმა ააგეს. მისი არქიტექტორები გია ბაღოშვილი და ოლეგ პატარიძე არიან.
2000 წელს ეკლესია ამიერკავკასიის ლათინური წესის კათოლიკეთა სამოციქულო ადმინისტრატორმა, მეუფე ჯუზეპე პაზოტომ აკურთხა და მას შემდეგ ღვთისმსახურება უწყვეტად მიმდინარეობს. ტაძარს ხშირად სტუმრობს საქართველოში ვატიკანის ელჩიც.
ბათუმი კი რელიგიური და ეთნიკური მრავალფეროვნებით ერთ-ერთი გამორჩეული ქალაქია. აქ გვერდიგვერდ ნახავ მეჩეთსა და მართლმადიდებლურ ტაძარს, სინაგოგასა და კათოლიკურ ეკლესიას, რაც ქალაქის ტოლერანტულ ბუნებაზე მიუთითებს.
Cookie პოლიტიკა