გუდანი-როშკა

სოფელი გუდანი

ხევსურების წეს-ჩვეულებების დიდი ნაწილი პირაქეთა ხევსურეთის სოფელ გუდანშია „დაბადებული“. აქედან იღებს სათავეს ხევსურთა ჩაცმულობა, აღჭურვილობა, ადათობრივი სამართალი და დღეობები. სოფელში მდებარეობს  ხევსურეთის უმნიშვნელოვანესი სალოცავი - გუდანის ჯვარი, რომელიც მთელი ხევსურეთის საკულტო ცენტრი იყო. საუკუნეების განმავლობაში აქ განიხილავდნენ ძნელად მოსაგვარებელ საერო საქმეებს, მსჯელობდნენ სამართლის ნორმების დაცვასა თუ შეცვლაზე.

სოფელი გუდანი ქალაქ დუშეთიდან 75 კმ-ის დაშორებით, ზღვის დონიდან 1720 მეტრზე მდებარეობს. გუდანიდან როშკამდე ერთ-ერთი ყველაზე მოკლე, მაგრამ შთამბეჭდავი მარშრუტი გელის.  

გუდანიდან 11-კილომეტრიანი სამანქანო გრუნტის გზით სოფელ უკანხადუმდე მიხვალ, ზღვის დონიდან 2000 მეტრზე. 

აქედან გზა ფეხით უნდა გააგრძელო. ბილიკი ნელ-ნელა რთულ კატეგორიაში გადადის. დაახლოებით 5 კმ-ში ტანიეს უღელტეხილზე ახვალ. ის კავკასიონის მთავარ ქედზე მდებარეობს და საქართველოში ერთ-ერთ ყველაზე რთულ სალაშქრო ზონად მიიჩნევა. აქედან გასაოცარი პანორამაა პირაქეთა ხევსურეთსა და მდინარე ხევსურეთის არაგვზე.

სოფელი როშკა

ტანიეს უღელტეხილიდან გზას დასავლეთით ვაგრძელებთ და დაახლოებით 10 კმ-ის შემდეგ ბოგოვაჩოს უღელტეხილითან მიდის, საიდანაც საავტომობილო გრუნტის გზით სოფელ როშკამდე ჩახვალ. 

სოფელი ზღვის დონიდან 2000 მეტრზე მდებარეობს. 

ბოგოვაჩოს უღელტეხილიდან როშკამდე მიმავალი გზის დაფარვა ავტომობილითაა რეკომენდებული.

გუდანი - როშკას მარშრუტი რთული კატეგორიისაა და მისი გავლა გამოცდილ, სერტიფიცირებულ გიდთან ერთად არის რეკომენდებული.