გურჯაანის ღვინის ფესტივალი

რას ნახავ ფესტივალზე?

ფესტივალზე თავის ღვინოებს წარმოადგენენ როგორც ღვინის კომპანიები, ისე საოჯახო მარნები. თუ გავითვალისწინებთ, რომ დღეს საქართველოში 500-ზე მეტი ჯიშის ყურძენი ხარობს, აქ არჩევანი საკმაოდ დიდია.

ახტალის პარკის ტერიტორიაზე ეთნოგრაფიული ექსპოზიციები ეწყობა, კულინარიული პავილიონები, სადაც შეგიძლია, თვალი ადევნო, როგორ კეთდება ყურძნის წვენისგან ქართული ტრადიციული ტკბილეული - ჩურჩხელა; როგორ ცხვება კახური შოთის პური; მიირთვა უგემრიელესი ქართული კერძები და ქართული ღვინო. 

აქ შეძლებ დააგემოვნო როგორც ტრადიციული ქართული მეთოდით - ქვევრში დაყენებული, ასევე ევროპული სტილით დაყენებული ღვინოები.

რატომ გურჯაანი?

მეღვინეობას საქართველოში 8000-წლიანი ისტორია აქვს. საქართველო რომ ნამდვილად ღვინის სამშობლოა, ამას საქართველოს ტერიტორიაზე აღმოჩენილი კულტურული ვაზის, ანუ მოვლილი ვაზის, პირველი ნაკვალევი, ნეოლითური ხანის ქვევრი და თიხის ჭურჭლის ფრაგმენტებში ჩარჩენილი ღვინის მჟავა ადასტურებს - ეს უკანასკნელი იმაზე მიანიშნებს, რომ ამ ჭურჭელში ბევრჯერ იყო ღვინო ჩამოსხმული.

ქვევრში ღვინის დაყენების ტრადიციულ ქართულ მეთოდს იუნესკომ არამატერიალური კულტურული მემკვიდრეობის ძეგლის სტატუსი მიანიჭა. 

გურჯაანი კი ქართული მეღვინეობის უმთავრესი რეგიონის - კახეთის მხარის გურჯაანის მუნიციპალიტეტის ადმინისტრაციული ცენტრია.

გურჯაანის მუნიციპალიტეტში 80-ზე მეტი ღვინის ქარხანაა, აქ მდებარეობს საქართველოში აღრიცხული საოჯახო მარნების დიდი ნაწილიც და აქ ასხამენ ქართული ადგილწარმოშობის დასახელების ცნობილ ღვინოებს: გურჯაანს, კარდანახს, ვაზისუბანს, ახაშენს, ახოებს, წარაფს, ზეგაანს და მუკუზანს, კოტეხს. 

ცნობისთვის: საქართველოში 29ადგილწარმოშობის ღვინოა დარეგისტრირებული, საიდანაც ნახევარზე მეტი კახეთში იწარმოება, აქედან 9 კი - გურჯაანის მუნიციპალიტეტში შემავალ მიკროზონებში. 

როგორც ხედავ, ღვინის დაყენება გურჯაანელთა მთავარი საქმიანობაა, ღვინის დაგემოვნება კი - ტურისტების საყვარელი პროცესი. ასე რომ, ეწვიე გურჯაანს და გურჯაანის ღვინის ფესტივალს.

თუ სურვილი გექნება, შემოდგომაზე ნებისმიერი გურჯაანელი სიამოვნებით მიგიპატიჟებს რთველში - დახუნძლული ვენახის ზვრებში, სადაც ყურძენს საკუთარი ხელით მოკრეფ და ღვინის დაწურვაშიც ჩაერთვები.