ზემო კრიხის მთავარანგელოზთა ეკლესია
ეკლესიას ორი შესასვლელი აქვს: სამხრეთის კარის თავი და კარიბჭის კარის თავი. სამწირველოს სარკმელი ჩუქურთმიანი ქვებით არის შემკული, კარიბჭის თაღი კი დამუშავებული ქვებისაგან აუწყვიათ. ჩუქურთმიანი ქვები, სვეტის თავების სახით, ეკლესიის შიგნითაც გვხვდება.
შიგნით ნახავ XI საუკუნის ისტორიული ფიგურების ფრესკებს, კანკელთან კი, საკურთხევლის ჩრდილო-დასავლეთი კედლის ძირში - ქვის უნიკალურ ნამუშევარს, დათვისა და ორი ბელის ბარელიეფს. ისინი თურმე ამ მიდამოებში ცხოვრობდნენ.
ზემო კრიხის ეკლესია განთქმული იყო თავისი საგანძურით, ვერცხლზე ნაჭედი ძვირფასთვლიანი ხატებით, რომლებსაც სამკაულიან ხატებს უწოდებენ. მათ შორის გამორჩეული იყო ვერცხლის ღვთისმშობლის ხატი, რომელიც ოქროთი იყო დაფერილი და ძვირფასი თვლებითა და მინანქრით დამშვენებული.
ტაძარი, რომლის კედლებზე შესრულებული წარწერები ამ ძეგლის შესახებ ბევრ ამბავს ინახავს, 1884 წელს განუახლებიათ და დასავლეთის მხარეს ახალი სივრცე მიუდგამთ.
Cookie პოლიტიკა