ნაფიჩხოვო - მთა მიგარია

დღე პირველი: სოფელი ნაფიჩხოვო - მთა მიგარია

ნაფიჩხოვო ერთ-ერთი უძველესი მეგრული სოფელია, რომლის ისტორია, ხალხური გადმოცემით, აიეტის დროინდელი კოლხეთიდან იწყება. სიმწვანეში ჩაფლული სოფლიდან მიგარიისკენ მიმავალ გზაზე მთიანი კოლხეთის ულამაზეს ტყეებს გაივლი. დაახლოებით 15 კმ-ში მწყემსების სადგომებს შეხვდები, სადაც დაბანაკდები და იქვე, წყაროზე სასმელი წყლის მარაგსაც შეივსებ. დასვენებისა და წახემსების შემდეგ გზის გაგრძელებას საცალფეხო ბილიკით შეძლებ.

მთის მასივის უმაღლესი მწვერვალი - მიგარია 2026 მ სიმაღლეზე მდებარეობს, რომლის სახელწოდებაც „მიგარია” (მინგარია)“ კოლხთა ერთ-ერთ რელიგიურ წარმოდგენას ასახავს, უფრო კონკრეტულად კი მიქაელ და გაბრიელ მთავარანგელოზებს უკავშირდება. აქ მიქელ-გაბრიელი, ანუ მიქანგარიო, მწყემსებისა და მთის მცველად  მიაჩნდათ.

მწვერვალზე რომ ახვალ, შენ წინ ულამაზესი კოლხეთის დაბლობი გადაიშლება, რის შემდეგაც საბანაკე ადგილზე დაბრუნებას შეძლებ და დაღამებას დაელოდები.

დღე მეორე: საბანაკე - ნაფიჩხოვო

თვალისმომჭრელი ბუნების დათვალიერების შემდეგ შეგიძლია, საბანაკე ადგილიდან იმავე მარშრუტით სოფელ ნაფიჩხოვოში დაბრუნდე. მიგარიის მდელოები და კირქვული მასივი ცნობილია ენდემური სახეობების მცენარეებით, მათ შორის არის უნიკალური მეგრული არყი (Betula megrelica), ულამაზესი ვორონოვია (Woronowia speciosa) და სხვა.