საფარის მონასტერი

საფარის მონასტრის ისტორია და არქიტექტურა

აქ შემთხვევით მოხვედრა შეუძლებელია, თუმცა საფარის მონასტერი დღეს იმდენად პოპულარულია, რომ მომლოცველები და ტურისტები არასდროს აკლია. 

სამონასტრო კომპლექსში სხვადასხვა დროს აშენებული ნაგებობები შედის: ეკლესიები, მცირე სამლოცველოები, სამრეკლო, ბერების სენაკები, სამეურნეო შენობები, ჯაყელთა სასახლისა და ციხე-გალავნის ნანგრევები - ჯაყელები XIII საუკუნის ბოლოდან სამცხის მთავრები იყვნენ და ეს მონასტერი მათი ერთ-ერთი რეზიდენცია გახლდათ.

მთავარი ნაგებობა XIII საუკუნის წმინდა საბა განწმენდილის გუმბათოვანი ტაძარია. ყველაზე ადრეული შენობა კი, რომელიც X საუკუნით თარიღდება, ღვთისმშობლის მიძინების ერთნავიანი ეკლესიაა. 

მონასტერი ცნობილია უნიკალური ფრესკებით, რომლებმაც ჩვენამდე საკმაოდ კარგად მოაღწია. 

საბჭოთა პერიოდში საფარა დაკეტილი იყო, მისი აღორძინება, საქართველოს სახელმწიფოებრივი დამოუკიდებლობის აღდგენასთან ერთად, 80-იანი წლების ბოლოს დაიწყო. დღეს აქ მოქმედი მამათა მონასტერია. 

მონასტრამდე ახალციხიდან ნებისმიერი გამავლობის ტრანსპორტით მიხვალ. გზად თავბრუდამხვევი სილამაზის ბუნებაა, ამიტომ ზოგი ტურისტი და მომლოცველი მონასტრამდე მისვლას ფეხით ამჯობინებს - მანძილი დაახლოებით 10 კმ-ია.