დავით ბააზოვის სახელობის ქართველ ებრაელთა ურთიერთობის ისტორიის მუზეუმი

რას გთავაზობს მუზეუმი?

მუზეუმის მდიდარი კოლექციის - 140 000-ზე მეტი ექსპონატის შესაგროვებლად 1933-1936 წლებში ეთნოგრაფიული ექსპედიციები მოეწყო ებრაელებით კომპაქტურად დასახლებულ რეგიონებში. შეგროვდა ეროვნული კოსტიუმები, რელიგიური თუ რიტუალური დანიშნულების ნივთები, აქსესუარები და ფოტოები;

მუზეუმში დაცულია ფერწერული და გრაფიკული ნამუშევრები, რომლებიც საგანგებოდ ამ მუზეუმისთვის შეიქმნა. მცხეთის ფერწერული ტილოს წინ აკვანი დგას - ეს ნივთი მუზეუმს ქართველი ებრაელის ოჯახმა აჩუქა, როგორც სიმბოლო იმისა, რომ ქართველი ებრაელობის აკვანი მცხეთაში ძვ.წ. VI საუკუნეში დაირწა. 

ამ ექსპონატების გარდა, მუზეუმში ასევე ნახავთ ისეთ საინტერესო ნივთებს, როგორებიც არის რაბინის ბეჭედი და წინადაცვეთის დანა.

ასევე აღსანიშნავია, რომ მუზეუმში გამოფენილია მსოფლიოში ცნობილი ავანგარდისტი ებრაელი მხატვრის სოლომონ გერშოვის ფერწერული ნამუშევრები.