ქუთაისის ასსაფეხურიანი კიბე

ქუთაისის ასსაფეხურიანი კიბის შესახებ

ქუთაისელებისთვის ერთ-ერთი ასეთი ადგილი ასსაფეხურიანი კიბეა. ის ძველ ქალაქში, ძველი სადგურის მოედნიდან იწყება და ქუთაისის ძველ უბანში - ბალახვანში ჩადის.

ასსაფეხურიანი კიბე ქუთაისში 1951-1952 წლებში აშენდა. მისი არქიტექტორი ქალაქის მთავარი არქიტექტორი - შოთა ლომთაძე იყო. კიბის გაკეთება ბუნებრივად მოითხოვა მაშინდელი სადგურის მოედნის გაფართოებამ, რაც ჯერ კიდევ 1933 წელს დაიგეგმა.  

კიბის სიგანე 8 მეტრია და ის ორად იყოფა შუაში ჩაშენებული მწვანე სივრცეებით. გვერდებზე, ქვის მოაჯირებზე, კიბეებს ქვის ლამპიონები ჩაუყვება. 2021-22 წლებში კიბეს რეაბილიტაცია ჩაუტარდა და მისი გარკვეული დეტალები განახლდა.

ასსაფეხურიანი კიბით, რომელიც ერთმანეთთან ქუთაისის ორ ისტორიულ ნაწილს აკავშირებს და ქალაქის ერთგვარი სავიზიტო ბარათია, დღის განმავლობაში მრავალი ადამიანი სარგებლობს.