შაორის წყალსაცავი

მოგზაურობის მარშრუტი

როდესაც მდინარე ხეორს გადაკვეთ და მთა ხიხათისკენ გაემართები, 6-7 კილომეტრში გზა მთისკენ გადაუხვევს. გადაივლი ხიხათას და ზღვის დონიდან 2239 მეტრზე არაამქვეყნიურ ღრუბლებში აღმოჩნდები. შენ წინ ულამაზესი ხედი გადაიშლება და თან გეოდეზიური ტრიანგულატორიც დაგხვდება.

მთის გადავლის შემდეგ მრავალძალში, ჭოლევის ტბასთან აღმოჩნდები, რომელსაც, გულის ფორმის გამო, „სიყვარულის ტბასაც“ ეძახიან. მრავალძალიდან გეზს ამბროლაურის მიმართულებით აიღებ, ამბროლაურის გავლის შემდეგ კი 7.1 კილომეტრზე გადაჭიმულ შაორის წყალსაცავსაც დაინახავ.  

რა დაგხვდება? - სანახაობები და აქტივობები

მრავალძალში ლამაზი რაჭული სახლები და არაჩვეულებრივი ხედები იშლება, კავკასიონიც კი მოჩანს აქედან. მრავალძალშია წმ. გიორგის სახელობის XI საუკუნის დარბაზული ტიპის ეკლესია ამავე საუკუნის წარწერებითა და მხატვრობის ფრაგმენტებით. 

ჭოლევის ტბასთან ულამაზესი ბუნება და საპიკნიკე ადგილები დაგხვდება. აქ თევზაობასაც შეძლებ, ისევე, როგორც შაორის ტბაზე. მიმდებარე ტყეში კი სოკოსაც უხვად გადააწყდები. თუ ფრინველებზე დაკვირვება გიყვარს, მაშინ ეს ადგილი აუცილებლად გაგაოცებს. 

შაორის სიახლოვეს კარსტულ მღვიმეებსა და 5-15 მ სიღრმის სხვავის საყინულეს ნახავ, რომელსაც ფსკერი მუდმივად თოვლით აქვს დაფარული. შაორი მიწისქვეშა წყლებითაც არის ცნობილი, რომელსაც ირგვლივ ბზა, შქერი, წიფლნარი, კავკასიური სოჭი და ფოთლოვანი ხეები აკრავს.