ჯამბაკურ-ორბელიანების სასახლე

სასახლის სტრუქტურა

სასახლის პირველ სართულზე უზარმაზარი საწნახლები და რამდენიმეტონიანი ქვევრებია განლაგებული, მეორე სართულზე - დარბაზები და საძინებლები, მესამეზე კი ვერანდაა, საიდანაც ულამაზესი ხედი იშლება. გალავნის შესასვლელთან კარის წმინდა გიორგის სახელობის ტაძარია, სასახლის გალავანში კი - ღვთისმშობლის შობის სახელობის ტაძარი, სადაც ანჩისხატად წოდებული ხელთუქმნელი ხატი ინახებოდა, რომელიც 1686 წელს თბილისში, ღვთისმშობლის სახელობის ეკლესიაში გადაასვენეს. 

სასახლის ისტორია

1924 წელს ბოლშევიკებმა ლამისყანის სასახლიდან 9 ურემი წიგნი და ხელნაწერები, „ბეკერის“ შავი როიალი, თეთრი პიანინო, ძვირფასი ავეჯი და ჭურჭელი გაიტანეს, დაცარიელებულ შენობაში ჯერ - კომუნა, შემდეგ კი კოლმეურნეობის გამგეობა განათავსეს. სხვადასხვა დროს აქ ფოსტა, ამბულატორია და სამშობიარო ბლოკი იყო. წმინდა გიორგის კარის ეკლესიაში კი მოსავალს ინახავდნენ.  

1986 წელს სასახლეში მუზეუმი გაიხსნა. მისი ექსპონატები XVIII-XIX საუკუნეების ეთნოგრაფიულ, ნუმიზმატიკურ, დოკუმენტურ, ფოტომასალას და სახვითი ხელოვნების ნიმუშებს მოიცავს. აქაა პოეტ დავით გურამიშვილის ცხოვრებისა და მოღვაწეობის ამსახველი ექსპოზიციაც, სასახლის ძველი მეპატრონეების საგვარეულო ჭურჭელი და სხვა.