ოზურგეთის სახელმწიფო დრამატული თეატრი
ოზურგეთის თეატრის შენობა, თბილისის ფილარმონიის შემდეგ, საქართველოში ერთ-ერთი ყველაზე დიდი ნაგებობაა თეატრალური წარმოდგენებისთვის.
თანამედროვე ინფრასტრუქტურით მოწყობილ შენობაში ხუთი სართული და 750-ადგილიანი მაყურებელთა დარბაზია ორი იარუსით. პარტერი ნახევრად წრიულია და დიდ სცენას უერთდება; იარუსები ქართული სტილის ორნამენტებითაა მოჩუქურთმებული.
ჭერის მხატვრობა აპოლონ ქუთათელაძეს ეკუთვნის - უდიდეს ქართველ ფერმწერ-ბატალისტს.
თეატრს ჰყავს მუდმივმოქმედი დასი, აღიარებულია, როგორც საუკეთესო რეგიონული თეატრი და მინიჭებული აქვს კულტურული ძეგლის სტატუსი.
ოზურგეთის დრამატული თეატრი ცნობილი ქართველი თეატრალური მოღვაწის, ამ თეატრის პირველი დადგმის რეჟისორის ალექსანდრე წუწუნავას სახელს ატარებს, რომელიც, თავის მხრივ, საოპერო რეჟისურისა და ქართული კინოს ერთ-ერთი ფუძემდებელი იყო.
Cookie პოლიტიკა