შუახევი - განუმეორებელი დასვენება მთაში

მთიან აჭარაში, მესხეთისა და შავშეთის ქედებზე, მდინარეების - აჭარისწყალისა და ჩირუხისწყალის შესართავთან პატარა დაბა შუახევი მდებარეობს. აქაურობა შედარებით ნაკლები სინესტით გამოირჩევა. ხეობის გასწვრივ არის ხმელთაშუა ზღვის ტიპის სუბტროპიკული ჰავა, იცის ცხელი, მშრალი ზაფხული და შედარებით თბილი ზამთარი. ზღვის დონიდან 420 მეტრ სიმაღლეზე მდებარე დაბას, რომელიც მაღალ მთებშია ჩაფლული, საინტერესო ისტორია აქვს. აქ დღემდეა შემორჩენილი შუა საუკუნეების ციხესიმაგრის ნანგრევები და ამავე პერიოდის თაღოვანი ხიდები.

რა დრო სჭირდება მგზავრობას:

თბილისი

6:55 სთ

ბათუმი

1:30 სთ

ქუთაისი

4:15 სთ

შუახევის ბუნება

შუახევის სამხრეთით შავშეთის ქედია, ჩრდილოეთით - აჭარისა და გურიის მთები. აქ მოგზაურობისას აუცილებლად უნდა მოინახულო ხშირი ტყითა და ჭაობისთვის დამახასიათებელი მცენარეებით გარშემორტყმული შავი ტბა, სადაც მრავლად ნახავ საპიკნიკე ადგილს.

შუახევი გამორჩეულია ფლორითა და ფაუნით. აქაურ ტყეებში ბინადრობს: შველი, არჩვი, გარეული ღორი, ზღარბი, კურდღელი, მელა, დათვი. მრავალფეროვანია ფრინველთა სამყაროც - აქ ნახავ: კოდალას, ოფოფს, კაკაბს, როჭოს, შაშვს, გუგულს, ტყის ქათამს. მდინარეებში ბევრია თევზი - კალმახი, წვერა, ღორჯო და სხვა.

მინერალური წყლები

შუახევი მდიდარია მინერალური წყლებითაც - ცნობილია შუახევის, შამბალეთის, ლამაზმარეს, ბათალვაკის, გუნდის, ბოგილის, ტყემალთის, უჩამბისა და სხვა წყლები.

მუნიციპალიტეტის პატარა სოფელ ტომაშეთის მიდამოებში ასევე გამოირჩევა გოგირდწყალბადიანი თერმული წყლები, რომელთა ტემპერატურა 30°C-ს აღწევს.

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა