წალკის (დაშბაშის) კანიონის ბუნების ძეგლი

რას ნახავ წალკის კანიონზე

კანიონის სიგრძე 8 კმ-ია, სიმაღლე კი რამდენიმე ასეულ მეტრს აღწევს. 

აქ გამორჩეული სანახაობა „მტირალი კედელია“ - კლდეებზე გადმოფენილი პატარა ჩანჩქერების ფარდა.

წალკის კანიონში მღვიმეებიც არის. მათ შორის ზოგი ბუნებრივი წარმოშობისაა, ზოგი კი ადამიანის შექმნილია. 

ფერდობების მცენარეული საფარი, ჩანჩქერებთან ერთად, უნიკალურ მიკროლანდშაფტსა და მიკროკლიმატს ქმნის. 

კანიონის ვიზიტორთა ცენტრიდან იწყება 1,8 კმ სიგრძის ბილიკი, რომელიც ჩანჩქერებამდე ჩადის. ჩანჩქერზე ბილიკით ჩასვლასა და ამოსვლას დაახლოებით ერთი საათი სჭირდება, თუმცა სპეციალური მანქანებით სარგებლობაც შესაძლებელია. 

თავად კანიონზე კი 240 მეტრი სიგრძის თანამედროვე შუშის ხიდია გადებული. ხიდის ქვეშ ბაიკ-ლაინით გასეირნებაც შეგიძლია. ხიდის შუაში მოწყობილია ბარ-რესტორანი, კანიონის ტერიტორიაზე კი 5-ადგილიანი, კომფორტული კოტეჯიც დგას, სადაც ღამის გათენება შეგიძლია.

კანიონთან ყველაზე ახლომდებარე დასახლებული პუნქტი ქალაქი წალკაა, რომელიც თბილისიდან 88 კმ-ით არის დაშორებული.