KA

იაზონის მღვიმე

გადმოცემის მიხედვით, გველეშაპი, რომელიც ოქროს საწმისს დარაჯობდა, სწორედ ამ მღვიმეში ცხოვრობდა. თუკი ამბავი კოლხი მედეასა და არგონავტების შესახებ ჯერ არ გსმენია, იცოდე, რომ კოლხეთში ოქროს საწმისის წამოსაღებად ჩასულ ბერძენ იაზონს ჰერამ, ათენამ და აფროდიტემ დიდი სამსახური გაუწიეს. მათ ეროსი დაიყოლიეს, რომ მედეასთვის სიყვარულის ისარი ესროლა. 
რეგიონი
იმერეთი
ქალაქი
ქუთაისი

შეყვარებულმა მედეამ იაზონს „პრომეთეს წამალი“ მისცა, რომელიც პრომეთეს სისხლზე აღმოცენებული მცენარისგან მზადდებოდა. მისი შემწეობით ბერძენი უფლისწული უძლეველი გახდა. სწორედ ეს დაეხმარა მას მედეას მამის, კოლხეთის მეფის, აიეტის დავალებების შესრულებაში. შეყვარებულმა მედეამ ჯადოსნური გალობითა და წამლის პკურებით გველეშაპი დააძინა და იაზონი ოქროს საწმისს დაეუფლა. 

აი, ამიტომ დაერქვა ქუთაისთან, წყალწითელას კანიონის სამხრეთში, სოფელ გოდოგნის ხიდთან არსებულ ბუნების ძეგლს იაზონის მღვიმე. 

ეს არის მცირე ზომის სტალაქტიტებით, სტალაგნატებითა და სტალაგმიტებით გამორჩეული 40 მეტრი სიგრძის მღვიმე, რომელსაც თაღის ფორმის შესასვლელი აქვს. მისი სიგანე თანდათან 2,5 მეტრამდე მცირდება, ხოლო სიმაღლე 0,5 მეტრამდე დაბლდება. ბოლოში მღვიმე ლამიანი ჩამონაშლითაა გადაკეტილი.

იაზონის მღვიმე მხოლოდ ამ მღვიმისთვის დამახასიათებელი ცხოველებითაა დასახლებული. აქ მოპოვებული ცხოველთა ძვლები და კაჟის იარაღები ცხადყოფს, რომ მღვიმე პალეოლითის ხანის ადამიანის სადგომი იყო.

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა