სოფელი მაზერი-შდუგრას ჩანჩქერი

გზა შდუგრას ჩანჩქერამდე

სალაშქრო მარშრუტი შდუგრას ჩანჩქერის ძირში მიგიყვანს, თუმცა ჩანჩქერის თავზე ასვლა და სვანეთის დამატყვევებელი ხედების დათვალიერებაც შეგეძლება. 

ჩანჩქერამდე მისასვლელი ბილიკი სოფელ მაზერიდან იწყება. გზა საშუალო სირთულისაა. შდუგრას ძირში მისასვლელად ფეხით სავალი მანძილი დაახლოებით 3 კმ-ია. იმ შემთხვევაში, თუკი ჩანჩქერის თავზე ასვლას გადაწყვეტ, დამატებით 3 კმ-ის გავლა და მდინარის გადაკვეთა მოგიწევს. 

გაითვალისწინე, რომ ჩანჩქერთან ახლოს აუცილებლად დაგჭირდება საწვიმარი. გზად თითქმის არსად არ შეგხვდება წყალი, ამიტომ უმჯობესია, მარაგი სოფელ მაზერში შეავსო და მესაზღვრეების პუნქტთან განაახლო.  

ბუნება და სანახაობები

სვანეთის ბუნება მდიდარია ულამაზესი ადგილებით. ერთ-ერთი გამორჩეული თავად შდუგრას, ანუ უშბის ჩანჩქერია. მისი სიმაღლე 120 მეტრს აღწევს. ის საქართველოში ყველაზე წყალუხვ ჩანჩქერად მიიჩნევა. 

ჩანჩქერამდე გზად ულამაზეს წიწვოვან ტყეს გაივლი. თუ ჩანჩქერის თავზე მოექცევი, მყინვარ უშბის ძირში ჩალაგებულ უზარმაზარ ლოდებს დაინახავ, შენ გარშემო კი ლამის ცამდე აზიდული მთები იქნება. 

ლაშქრობისთვის საუკეთესო პერიოდია გაზაფხული, ზაფხული და შემოდგომა.