KA
Mtatsminda

მთაწმინდა

მთაწმინდა ყველაზე მაღალი და ყველაზე ცნობილი მთაა თბილისის გარემომცველი მთებიდან. მისი სიმაღლე 770 მეტრია და აქ თუ ამოხვალ, ჩიტის გაფრენის სიმაღლიდან გადახედავ ქალაქს. ირგვლივ კი ბევრი სანახაობა დაგხვდება - დასასვენებელი პარკი, რესტორნები, ატრაქციონები მთელი ოჯახისთვის, ეკლესია და პანთეონი, რომელსაც საინტერესო ისტორია აქვს. ასვლა შეგიძლია როგორც სამანქანო გზით, ისე ულამაზესი ფუნიკულიორით - 1905 წელს აშენებული სამთო-საბაგირო რკინიგზით, რომლის ბილეთის შეძენასაც ადგილზე შეძლებ.
რეგიონი
თბილისი
ქალაქი
თბილისი

მთაწმინდის ისტორია

სახელი „მთა წმინდა“ წმინდა მამა დავით გარეჯელს უკავშირდება, რომელიც VI საუკუნეში ქრისტიანობის საქადაგებლად ჩამოვიდა საქართველოში და ამ მთაზე დამკვიდრდა.  

ეს დიდი ისტორიაა და მის „სანახავად“ მამადავითის ეკლესიაში უნდა მიხვიდე, რომელიც XIX საუკუნის ბოლოს იქვე აშენდა.  

1929 წელს მამადავითის ეკლესიის მახლობლად, ღია ცის ქვეშ, გამოჩენილი ქართველი მოღვაწეების პანთეონი გაიხსნა. 

ასე დაიწყო მთის ახალი სიცოცხლე საუკუნის წინათ.

სანახაობები

მთაწმინდაზე დგას თბილისის ერთ-ერთი სიმბოლო - ტელეანძა და გიგანტური „ეშმაკის ბორბალი“, რომლებსაც აქ ამოსვლამდე ქალაქის ნებისმიერი წერტილიდან დაინახავდი. 

პარკ „ბომბორაში“ 3 თაობის ატრაქციონებია - საბავშვო, საოჯახო და ექსტრემალური. ფუნიკულიორის 3-სართულიან შენობაში კი, რომელიც თბილისის ისტორიულ-არქიტექტურული ღირსშესანიშნაობაა, მრავალფეროვანი არჩევანია გურმანებისთვის - აქ ნახავ რესტორანს, კაფესა და ლაუნჯ-ბარს.

ამ ყველაფრის ირგვლივ წიწვოვანი ტყე და იდეალური სასეირნო-საპიკნიკე ადგილებია.  აქედან საფეხმავლო ბილიკები მიდის კუს ტბის, ნარიყალას და სოლოლაკის მიმართულებით.

 

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა