ჩირუხის მთა

როგორ მოხვდები ჩირუხის მთასთან?

ჩირუხამდე მისასვლელი გზა გრუნტისაა და მთაზე ასვლა ფეხითაც არ არის რთული. კვირის გარკვეულ დღეებში აქ სოფელ შუბანიდან უფასო ტრანსპორტი მოძრაობს. ამ სოფლამდე კი ავტობუსები ბათუმის ავტოსადგურიდან გადის. ჩირუხის მთაზე მოსახვედრად ჯერ დაბლობი უნდა გაიარო – მარეთის ხეობიდან ოლადაურამდე. შემდეგ ფერისცვალების ეკლესიასთან აღმართს უნდა აუყვე, რომელიც მთის ფერდთან მიგიყვანს. ამ ადგილიდან წელიწადის ნებისმიერ დროს ზღაპრული პეიზაჟი იშლება. 

რას ნახავ?

ალაგ-ალაგ შეფენილი ხის მუქი სახლებიც ბუნებრივადაა შერწყმული გარემოსთან. ზამთარში გადათეთრებული ხეობა და სახლებიდან ამომავალი კვამლი მოყვარული ფოტოგრაფებისა თუ მხატვრებისთვის იდეალური შთაგონების წყაროა. ზაფხულსა და გაზაფხულზე აქ ყველაფერი მწვანეშია ჩაფლული, შემოდგომაზე კი სანახაობას ოქროსფრად მოელვარე ფოთლები ქმნის.

ჩირუხის მთა მარეთის ხეობის გზის ბოლოსაა. ამ ალპურ სოფელში მცხოვრებლები ადრე გაზაფხულზე ადიან და გვიან შემოდგომამდე რჩებიან. წელიწადის ამ დროს აქ ცხოველების, ფრინველების ხმები და ბავშვების ჟრიამული ერთმანეთს ერწყმის, სოფლის ნატურალური პროდუქტების სუნი კი ჰაერში ირევა. აქ ყოველ საღამოს კოცონს ანთებენ, ადგილობრივები გარშემო შემოუსხდებიან და ცეცხლზე კარტოფილსა და სიმინდს წვავენ. ეს რიტუალი სოფელს ერთ დიდ ოჯახად აქცევს. 

კერძები, რომლებიც უნდა დააგემოვნო

აუცილებლად უნდა გასინჯო ადგილობრივების მიერ დამზადებული რძის პროდუქტები: კაიმაღი, დაწნული ყველი, მაწონი; ასევე კერძები: ბორანო, ქალაჯო, სინორი და სხვა. სახლში გამომცხვარი ცხელი პურის სურნელი კი თავად მიგიტყუებს სუფრასთან. 

როდესაც აქ მოხვდები, კიდევ ბევრი დეტალი გაგრძნობინებს, რომ ქალაქის ყოველდღიური ხმაურისგან შორს სულ სხვა, ზღაპრული სამყაროც არსებობს.