KA

არხილოსკალო

დღეს არხილოსკალოს მსოფლიო იცნობს - კახეთის ამ პატარა სოფელში დაიბადა და გაიზარდა 2020 წლის ოლიმპიური თამაშების ჩემპიონი, ქართველი ძიუდოისტი ლაშა ბექაური. ლაშას ყველა ინტერვიუში გაიგონებ არხილოსკალოს სახელს, იგრძნობ სოფლისადმი მის დიდ სიყვარულს და თუ აქ ჩამოხვალ, საკუთარი თვალით ნახავ, სად და როგორ იზრდებიან ოლიმპიური ჩემპიონები.
რა დრო სჭირდება მგზავრობას:
თბილისი
2:45 სთ
ბათუმი
8:05 სთ
ქუთაისი
5:50 სთ

არხილოსკალოს ისტორია

სოფლის გორაკებიდან ულამაზესი პანორამა იშლება - „საქართველოს პურის ბეღელი“,  შირაქის ველის აღმოსავლეთი ნაწილი, რომელიც 35 კილომეტრზეა გადაჭიმული და  მარცვლეული კულტურების სახნავ-სათესად გამოიყენება. ამ ტერიტორიაზე ყველაზე დინჯი და მშვიდი მდინარე ალაზანი ჩამოდის. მისი ნაპირების გასწვრივ XIX საუკუნეში სამი სოფელი დასახლდა და მათ შორისაა არხილოსკალო.

დღესდღეობით, აქ, მიტოვებული სამხედრო აეროდრომი და დაცლილი ანგარები მოგზაურთა საყვარელი ადგილია ფოტომოგონებების დასაგროვებლად.

არხილოსკალოს მდებარეობა

დედოფლისწყაროს მუნიციპალიტეტის ეს პატარა სოფელი დაბალი მთის კლიმატური კურორტია.

არხილოსკალო ზღვის დონიდან 700 მეტრზე მდებარეობს. აქ უმეტესად მზიანი დღეები და სტეპის სუსტი მშრალი ქარები იცის. ამ ტერიტორიაზე, 500 მეტრის რადიუსში, მზის სხივებს სამკურნალო თვისებები აქვს და განსაკუთრებით სასარგებლოა თირკმელების ანთების დროს.

სოფელი თანამედროვე ცხოვრებით ცხოვრობს. აქ ღამის გათენება შესაძლებელია კოტეჯებშიც და კარავშიც - ამისთვის არხილოსკალოს გაშლილ ვაკეზე ბევრი კარგი ადგილია.

არხილოსკალოს ღირსშესანიშნაობები

სოფელში ერთი საინტერესო არქეოლოგიური ძეგლია აღმოჩენილი - ძვ. წ. I საუკუნის და ახ. წ. I საუკუნის სამაროვანი. 

წმინდა გიორგის სახელობის ეკლესია კი სულ ახალგაზრდა ტაძარია - ის საქართველოს პატრიარქის კურთხევითა და ადგილობრივი მოსახლეობის ძალისხმევით აიგო. როცა ტაძრის საძირკველს თხრიდნენ, მიწაში ისეთი რამ აღმოაჩინეს, რომელმაც ხალხში ლეგენდად გავრცელებული უმძიმესი ამბავი დაადასტურა... თუმცა ამის შესახებ ადგილზე მოგიყვებიან.

და კიდევ, არხილოსკალოდან კავკასიონს უნდა გადახედო - ეს სასწაული ემოციაა და ის ენერგია მოაქვს, რომელიც 21 წლის ბიჭს ოლიმპიურ ჩემპიონად აქცევს და მთელი მსოფლიოს გასაგონად ათქმევინებს: ჩემი სამშობლოა არხილოსკალო, საქართველო!

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა