KA

საირმე

ამ მხარეში სიმწვანეში ჩაფლული ტყეების თითოეული მცენარე თითქოს თავის საიდუმლოს გიყვება, გარშემო კი ფაუნის გასაოცარი და კეთილშობილი წარმომადგენლები, ირმები სახლობენ. ეს ერთი შეხედვით ზღაპრული გარემო სულაც არაა გამოგონილი, რადგან ბაღდათის მუნიციპალიტეტში, ზღვის დონიდან 950 მეტრ სიმაღლეზე ევროპის ერთ-ერთი ყველაზე დიდი ბალნეოლოგიურ-კლიმატური კურორტი - საირმე მდებარეობს.
რა დრო სჭირდება მგზავრობას:
თბილისი
4:25 სთ
ბათუმი
3:20 სთ
ქუთაისი
1:20 სთ

ლეგენდა საირმის შესახებ

ისტორიულ წყაროებში საირმე XIX საუკუნიდან გვხვდება. ლეგენდის თანახმად კი, ძმები წითლად შეღებილი წყაროს წყლის კვალს გაჰყოლიან, რომელსაც ისინი დაჭრილ ირმამდე მიუყვანია. როგორც შემდეგ აღმოჩნდა, ტერიტორია ირემთა სიუხვით გამოირჩეოდა. სახელი „საირმეც“ ამ ადგილს სწორედ ამიტომ ეწოდა. 

საირმის უნიკალური თერმული წყლები

XIX საუკუნის 90-იან წლებში აქ მწყემსები უცნაურ მიწას წააწყდნენ. თურმე ის თოვლით არასდროს იფარებოდა და წვიმა რამდენიმე წამში შრებოდა. ადგილი „ჯადოსნურ მიწად“ მიიჩნიეს. მისი საიდუმლო მხოლოდ XX საუკუნის 20-იან წლებში გამჟღავნდა, როცა გეოლოგებმა მიწის სიღრმეში ცხელი მინერალური წყალი აღმოაჩინეს.

საირმე სამკურნალო წყლების მრავალფეროვნებით ერთ-ერთი ყველაზე მდიდარი კურორტია. აქ ამოედინება ერთი თერმული და 4 სხვადასხვა თვისების მქონე მინერალური წყალი, რომლებიც არაერთი დაავადების სამკურნალოდ გამოიყენება, მათ შორის: თირკმლის, ნაღვლისა და კუჭ-ნაწლავის დაავადებების. 

საირმის მთავარი ღირებულებაც სამკურნალო-სარეაბილიტაციო ცენტრებია – თერმული აბანოები, სპა და გერმანული ტექნიკით აღჭურვილი ველნეს ცენტრი. განსაკუთრებული პოპულარობით სარგებლობს სახის გამაჯანსაღებელი და გამაახალგაზრდავებელი პროცედურები. 

 

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა