კალაური

რას ნახავ აქ?

კალაური კახეთის ერთ-ერთი უძველესი სოფელია. მისი სახელი ისტორიულ წყაროებში პირველად XIV საუკუნეში გვხვდება.

სოფლის შემოგარენში, ულამაზეს ფოთლოვან ტყეში შენს ყურადღებას შუა საუკუნეების ეკლესია-მონასტრების სიმრავლე მიიქცევს. აქ თითქმის ყოველ ნაბიჯზე შეგხვდება ეკლესია ან ეკლესიის ნაშთი. 

მათ შორის არის: 

იოანე ნათლისმცემლის სამონასტრო კომპლექსი - აშენებულია IX საუკუნეში. მონასტრის მთავარი ნაგებობა ნათლისმცემლის ეკლესიაა. ტაძრის გვერდით, სამხრეთ სამლოცველოში კახეთ-ჰერეთის მეფის კვირიკე III-ის საფლავია.

წმინდა გიორგის ეკლესია - აშენებულია VI-VII საუკუნეებში.

სოფლის ცენტრში კი წმინდა ნინოს დარბაზული ეკლესია დგას, რომელიც გვიან შუა საუკუნეებს განეკუთვნება.

სოფლიდან ტყემდე გზა და შემდეგ ტყის ბილიკები იდეალურია ფეხით ლაშქრობისთვის.

ღვინო

ეკლესია-მონასტრებს რომ მოივლი, ამის შემდეგ აქაური ღვინოც უნდა დააგემოვნო.

სოფელში უძველესი დროიდანაა განვითარებული მევენახეობა-მეღვინეობა და დღესაც თითქმის ყველა ოჯახში აყენებენ ღვინოს.

კალაურში ნახავ ავთენტიკური სახით შემორჩენილ, XVII საუკუნის „პაპოაანთ“ მარანს (ჯანიაშვილების მარანს), რომელიც კალაურის ერთგვარი სავიზიტო ბარათია.

კალაური გურჯაანი-თელავის ცენტრალურ გზაზე მდებარეობს და სოფელში სტუმრობა წელიწადის ნებისმიერ სეზონზე შეგიძლია.