ყაზბეგის ეროვნული პარკი

ეროვნული პარკის 35% ტყითაა დაფარული, სადაც 1347 სახეობის მცენარეა გავრცელებული და მათგან 26% ენდემურია. დანარჩენ ფართობზე კი ალპური მდელოები, თოვლიანი მწვერვალები და მიუდგომელი კლდეებია, რომლებიც იშვიათი სახეობის მრავალი ცხოველისა და ფრინველის თავშესაფარია. 

ყაზბეგის ეროვნულ პარკში აუცილებლად სანახავი ადგილებია:

1. თრუსოს ხეობა, უძველესი ნასოფლარებით. რამდენიმე მათგანში დღეს მონასტერი ფუნქციონირებს. ხეობა მდიდარია მინერალური წყლებით, მათ შორის საინტერესოა მინერალური წყლებიდან გამოლექილი ტრავერტინები და აბანოს მინერალური ტბა;

2. დარიალის ხეობა, სადაც მდებარეობს სტეფანწმინდა, მყინვარწვერი, გერგეტის სამება, დარიალის ციხე და ასევე არაერთი ბუნების ძეგლი; 

3. ხდის ხეობა, რომელიც საქართველოს ჩრდილოეთ მიჯნაზე, ლარსის საზღვართან მდებარეობს. ხეობის გზა შავანის ქედის ძირში, ულამაზეს მწვერვალებს შორის გადის, რომელთა სიმაღლე 4000 მეტრს აღემატება;

4. სნოს ხეობა და აქ მდებარე სოფლები სნო და ჯუთა - ყველაზე მაღალი დასახლებული პუნქტი (2 200 მ) ყაზბეგში; სნოს ხეობაშია ჭაუხის ულამაზესი მთები, სადაც მოლაშქრეთა, მეკლდეურთა, ალპინისტთა და ზამთარში სკიალპინისტთა საყვარელი მარშრუტებია.

შთამბეჭდავი ტურის შემდეგ შეგიძლია, ეროვნული პარკის ტერიტორიაზე მაღალი კლასის სასტუმროში ან კომფორტულ საოჯახო სახლში დაისვენო.