KA

ველოტური: ჟინვალის წყალსაცავის წრე

ჟინვალის წყალსაცავი მცხეთა-მთიანეთის მხარეში, დუშეთის მუნიციპალიტეტში, დაბა ჟინვალის ჩრდილოეთით მდებარეობს და ის საქართველოს ერთ-ერთი ულამაზესი ადგილია. თუკი ველოტურები გიზიდავს, ეს ადგილი შენთვის საუცხოო გამოცდილების მომტანი იქნება, რადგან ახალი და საინტერესო ადგილების აღმოჩენას ჟინვალის წყალსაცავის წრეზე ველოტურით ერთ დღეში შეძლებ.

როგორ მოხვდე ჟინვალის წყალსაცავთან?

თბილისიდან შატილის გადასახვევამდე მანძილს მანქანით გაივლი. იქიდან კი გზას ველოსიპედით დაადგები. 

მთებს შორის მოქცეული მოელვარე წყალი საოცარ ხედებს ქმნის. წყალსაცავის მაქსიმალური სიღრმე 75 მეტრია და ის სასმელი წყლით თბილისის მოსახლეობის ნახევარს ამარაგებს. ჟინვალის წყალსაცავი და მიმდებარე ტერიტორია წლის ნებისმიერ დროს ულამაზესია და ამიტომ აქ უამრავ ადამიანს შეხვდები.

ბუნება, რომელსაც ველოტურისას იხილავ

ზამთარში აქაურობა მისტიკურ ელფერსაც იძენს. ამ დროს წყალსაცავში წყლის დონე იკლებს და XII საუკუნის ჯვარპატიოსნის ეკლესია ჩნდება, რომელიც 1985 წელს ჟინვალის ჰიდროკომპლექსის მშენებლობისას წყლის ქვეშ მოექცა. 

ველოტურის ფარგლებში, ქართული ხუროთმოძღვრების ერთ-ერთ უმნიშვნელოვანეს ძეგლს - ანანურის კომპლექსსაც ნახავ. ანანურის ციხე, რომელიც მრავალი ბრძოლის ადგილი იყო, XVI-XVII საუკუნეებით თარიღდება. 

ჟინვალის წყალსაცავიდან უკან იმავე გზით დაბრუნდები: შატილის გადასახვევამდე - ველოსიპედით, იქიდან თბილისამდე კი - ავტომანქანით.

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა