ლებარდე - დიდი ტობა - პატარა ტობა - ასხის მასივი - სოფელი ზუბი

გასავლელი მანძილი, ჯამში, 75 კილომეტრია და მის დაფარვას 5 დღე სჭირდება. მარშრუტის გავლა რეკომენდებულია გამოცდილ, სერტიფიცირებულ გიდთან ერთად. აქ ლაშქრობისთვის საუკეთესო პერიოდია ივლის-სექტემბერი.

კურორტი ლებარდე

მარშრუტი კურორტ ლებარდეში იწყება, რომელიც მარტვილის მუნიციპალიტეტში, ზღვის დონიდან 1600 მეტრზე მდებარეობს. ლებარდე ბალნეოლოგიურ-კლიმატური კურორტია, სადაც მიწის ზედაპირზე თვითდინებით ამოდის სამკურნალო თვისებების მქონე მინერალური წყალი. 

ლებარდედან გზა ტბებისკენ ჯერ ტყეში გადის, შემდეგ ალპურ მდელოზე გრძელდება. კურორტიდან 10 კილომეტრით არის დაშორებული ტბა - დიდი ტობავარჩხილი (მეგრულად ვერცხლის ტბა), რომელიც ზღვის დონიდან 2300 მეტრზე მდებარეობს, მისგან 3 კილომეტრში, ზღვის დონიდან 2380 მეტრზეა მომდევნო, შედარებით მომცრო ზომის ტბა - ჭიჭე ტობავარჩხილი.  ტბების მიმდებარე ტერიტორია იდეალურია კემპინგისთვის. 

ასხის კირქვული მასივი

ტურის შემდეგი გაჩერება ასხის კირქვული მასივია, რომელიც დასავლეთ სამეგრელოსა და ლეჩხუმის საზღვარია. პლატოზე ასვლისას გზად მწყემსების საზაფხულო სადგომებია, სადაც ღამის გათენება შეიძლება.

პლატო 2000-2100 მ სიმაღლეზე მდებარეობს. აქ ულამაზესი სუბალპური და ალპური მდელოებია და კარვებით დასარჩენად პოპულარული ადგილია.  

სოფელი ზუბი

ასხის მასივიდან 30 კილომეტრში და ზღვის დონიდან 640 მეტრზე,  მდ. ცხენისწყლის მარჯვენა ნაპირზე მდებარეობს ცაგერის მუნიციპალიტეტის სოფელი ზუბი. სოფლის მიდამოებში შემორჩენილია შუა საუკუნეების, თითქმის მიუვალი ციხესიმაგრის ნანგრევები. ზუბი განსაკუთრებით ცნობილია იმით, რომ აქ იშვიათი ქართული წითელყურძნიანი ვაზის ჯიში, უსახელოური ხარობს.