ბათუმის ევროპის მოედანი

ისტორიული ნაწილის ცენტრად ითვლება და ქალაქის მემკვიდრეობის გამორჩეული ნაწილია, როგორც კულტურული, ისე წმინდა არქიტექტურული კუთხით (ბათუმის ისტორიული შენობების მნიშვნელოვანი ნაწილი სწორედ ევროპის მოედნის მიმდებარედაა განთავსებული). მოედანი ერთნაირად პოპულარულია როგორც ტურისტებში, ისე ადგილობრივებში, როგორც ქალაქის ერთ-ერთი სიმბოლო და კულტურული ცენტრი.

სად მდებარეობს ბათუმის ევროპის მოედანი? 

ევროპის მოედანი ძველი ბათუმის ცენტრალურ მონაკვეთში, მემედ აბაშიძის გამზირზე მდებარეობს. XIX-XX საუკუნეების არქიტექტურული ანსამბლი ქმნის ქალაქში უნიკალურ ატმოსფეროს, მოედნის გარშემო განლაგებული ნაგებობები კი ქალაქის მულტიეთნიკური ისტორიული წარსულის ნათელი ილუსტრაციაა. აქ სხვადასხვა არქიტექტურული სტილი - ტრადიციული ქართული, ევროპული და აღმოსავლური ელემენტები - ერთმანეთს ერწყმის. განსაკუთრებით აღსანიშნავია შენობების ფასადებზე შემორჩენილი დეკორატიული ელემენტები, ორნამენტები და მხატვრული დეტალები, რომლებიც მე-19 საუკუნის ბათუმის განსაკუთრებულად წარმატებული პერიოდის მახასიათებელია.

მოედნის ცენტრალური და უმნიშვნელოვანესი ელემენტია მედეას მონუმენტური ქანდაკება, რომელიც სკულპტორმა დავით ხმალაძემ 2007 წელს შექმნა. მასიურ კვარცხლბეკზე აღმართული ბრინჯაოს ქანდაკება, რომელსაც ხელში ოქროს საწმისი უჭირავს, არა მხოლოდ ისტორიული კოლხეთის დიდებისა და კულტურული მემკვიდრეობის სიმბოლოა, არამედ დღევანდელი საქართველოს ევროპულ ცივილიზაციასთან მრავალსაუკუნოვანი კავშირის ხაზგასმაც. საწმისი, რომელიც ქანდაკების ფოკალური ნაწილია (და ნამდვილი ოქროს ფენებითაა დაფარული), ქვეყნის სიმდიდრის, კულტურულ მემკვიდრეობას და მომავლის პერსპექტივების სიმბოლოა.

მოედნის მნიშვნელობა კიდევ უფრო გაიზარდა 2010-იან წლებში, როდესაც ის მნიშვნელოვანი კულტურული და სოციალური ღონისძიებების ცენტრი გახდა. დღესაც კი სწორედ აქ იმართება ქალაქის მთავარი საზეიმო ღონისძიებები, მათ შორის კონცერტები, ფესტივალები და საახალწლო დღესასწაულები. 

მოედანი და მისი მიმდებარე ტერიტორია მნიშვნელოვანი რეაბილიტაციის საგანი იყო აჭარის ავტონომიური რესპუბლიკის ტურისტული ინფრასტრუქტურის განვითარების ფარგლებში. განახლდა არსებული მოსასვენებელი ზონები და მოეწყო ახლები, დაემატა თანამედროვე განათების სისტემები, მასიური გამწვანების პროგრამის ფარგლებში დაირგო ახალი ნერგებიც (თუმცა მწვანე საფარი მოედანზე შედარებით მწირია) და არსებული ინფრასტრუქტურული ელემენტები ნაწილობრივ შეიცვალა, ისე, რომ გამარტივებულიყო ფართომასშტაბიანი ღონისძიებების ჩატარება - ბოლო წლებში გაზრდილი ბათუმის მუდმივი რეზიდენტების რიცხვისა და ტურისტული ნაკადების ფონზე ხშირად არსებული სივრცე საკმარისი არ ყოფილა ღონისძიებების კომფორტულად ჩასატარებლად. გატარებულმა სამუშაოებმა გაზარდა ერას მოედნის ესთეტიკური და ფუნქციური ღირებულება - და ასევე გაზარდა მისი პოპულარობა და ცნობადობა ვიზიტორებში.

როგორ მივიდეთ ევროპის მოედნამდე

ევროპის მოედანი ქალაქის ცენტრალური ადგილია და მახლობლად რამდენიმე ავტობუსის ხაზი ჩაივლის. მათ შორის ყველაზე მოხერხებული არჩევანი დამოკიდებულია თქვენს საწყის ლოკაციაზე. 

ტრანსპორტით მგზავრობის შემთხვევაში უნდა გაითვალისწინოთ, რომ თავად ევროპის მოედანი დიდწილად საფეხმავლო ტერიტორიაა, ამიტომ ცოტა ფეხით სიარული ყველა ვარიანტში დაგჭირდებათ. გაწყობთ ნებისმიერი ავტობუსი რომელიც აჩერებს რუსთაველის გამზირის 1-დან 20 ნომრამდე, ან გოგებაშვილის ქუჩის დასაწყისში - ამ ტერიტორიიდან ერას მოედნამდე სასიარულო 5-დან 10 წუთამდეა.

თუ მოედანს მეორე მხრიდან მიუდგებით, გაწყობთ ნებისმიერი ავტობუსი, რომელიც გაივლის ზურაბ გორგილაძის ქუჩის დასაწყისში ან დემეტრე თავდადებულის ქუჩაზე. მოხერხებული იქნება, თუ საორიენტაციო წერტილად ბათუმის საკათედრო ტაძარს აიღებთ - მიმდებარე ტერიტორიიდან ევროპის მოედნამდე ასევე მაქსიმუმ 10 წუთია სასიარულო.

ბათუმის სატრანსპორტო კომპანიის ინფორმაციით, 1, 3, 10, 12 და 13 ის ავტობუსებია, რომელთა მარშრუტიც ყველაზე ახლოს გაივლის ევროპის მოედანთან. მაგრამ გაითვალისწინეთ, რომ კომპანიას არ აქვს გუგლის რუკის მხარდაჭერა, ამიტომ ინფორმაცია მიმართულებასა და უახლოეს გაჩერებაზე გადაამოწმეთ მძღოლებთან. 

თუ უკვე ქალაქის ცენტრში იმყოფებით, მოედნამდე მისვლა ფეხითაც მარტივად შეგიძლიათ. ბათუმის ბულვარიდან მოედნამდე მისასვლელად დაახლოებით 10 წუთია საჭირო - უნდა გამოუყვეთ ნებისმიერ პერპენდიკულარულ ქუჩას (მაგალითად, მემედ აბაშიძის გამზირს) ქალაქის ცენტრის მიმართულებით. პიაცადან მომავალი ვიზიტორებისთვის კი სასიარულო დრო 5 წუთს არ აღემატება.

ახლომდებარე ღირსშესანიშნაობები

ბათუმის ბულვარი - ქალაქის ყველაზე ცნობილი ადგილი, ე.წ. “ძველი ბულვარი”, რომელიც 7 კილომეტრზეა გადაჭიმული 1987 წლიდან საქართველოს საბაღე-საპარკო ხელოვნების ძეგლია. ბულვარის ტერიტორიაზე, 1500 კვ.მ ფართობზე გაშენებულია ბამბუკების ნაკრძალი, სადაც 2500-მდე მოსოს ჯიშის ბამბუკი ხარობს. ბულვარის შესასვლელში დგას ცნობილი მოცეკვავე შადრევანი. შადრევნის წყლის ქორეოგრაფია სინქრონიზებულია მუსიკასთან და სამგანზომილებიან ლაზერულ შოუსთან, რომელიც 21:00-დან ღამის 2 საათამდე იმართება. ბულვარში ასევე მრავლადაა კაფე-რესტორნები, საბავშვო ატრაქციონები და სხვადასხვა გასართობი სივრცე.

ალი და ნინო - 8 მეტრის სიმაღლის სკულპტურა "ალი და ნინო" ცნობილ ქართველ მოქანდაკე თამარ კვესიტაძეს ეკუთვნის. მოქანდაკის შთაგონების წყარო ყურბან საიდის ცნობილი რომანი “ალი და ნინო” გახდა, რომელიც აზერბაიჯანელი მუსულმანი ალი ხან შირვანშირისა და ქართველი ქრისტიანი ნინო ყიფიანის სიყვარულის ისტორიაზეა. მასიური ლითონის ფიგურები ერთმანეთისკენ მოძრაობენ, ერთ მთლიანობად იქცევიან, და შემდეგ კვლავ სცილდებიან ერთმანეთს. პროცესი 10 წუთში ერთხელ მეორდება. საღამოს საათებში ქანდაკებაზე სპეციალური განათება ირთვება. 

ბათუმის ეშმაკის ბორბალი - 55 მეტრი სიმაღლის პანორამული ბორბალი ზედ სანაპიროზე, ბათუმის საოცრებათა პარკის ერთ-ერთი ყველაზე ცნობადი ძეგლი. ერთი სრული ბრუნი 10 წუთს გრძელდება. ბორბალი ერთდროულად 240 ადამიანს იტევს. კაბინები აღჭურვილია კონდიცირების სისტემით და პანორამული ფანჯრებით, საიდანაც იშლება ხედები ქალაქზე, მთებზე და ზღვაზე. საღამოს საათებში ბორბალი განათებულია მრავალფეროვანი LED განათებით.

ანბანის კოშკი - 130 მეტრი სიმაღლის უნიკალური ნაგებობა, რომლის არქიტექტურაც დნმ-ის სტრუქტურას იმეორებს. მასიურ ხვეულ ლითონის ზოლებზე კი განლაგებულია ქართული ანბანის 33 ასო. კოშკში განთავსებულია მბრუნავი პანორამული რესტორანი, რომელიც 360 გრადუსით ბრუნავს ერთი საათის განმავლობაში, საშუალებას აძლევს სტუმრებს დატკბნენ ქალაქის ხედებით. ანბანის კოშკში ასევე მდებარეობს საკონფერენციო დარბაზი და VIP სივრცეები სხვადასხვა ღონისძიებებისთვის.

ბათუმის პიაცა - ევროპაში უდიდესი ფიგურატული მარმარილოს მოზაიკით შემკული მოედანი. მოზაიკა, რომელიც 2010 წელს შეიქმნა ნატალი დე პიტა-ამირეჯიბის ესკიზების მიხედვით, 88 მილიონზე მეტი დამუშავებული მარმარილოს ფილისგან, შედგება. ბათუმის პიაცას გარს აკრავს რესტორნები, კაფეები და სასტუმროები. 

ბათუმის საკათედრო ტაძარი - 1897 წელს აშენებული ნეო-გოტიკური სტილის სამგუმბათიანი ბათუმის საკათედრო ტაძარი, გამოირჩევა მდიდრული ვიტრაჟებით, შავი და თეთრი მარმარილოს მოზაიკური იატაკით და გოტიკური არქიტექტურისთვის დამახასიათებელი მაღალი, შპილებიანი კოშკებით. ინტერიერში შენარჩუნებულია ორიგინალური ფრესკები და ხატები, ხოლო ფასადზე განთავსებულია წმინდა ანდრია პირველწოდებულისა და წმინდა ნინოს ქანდაკებები შესაბამისი წარწერებით.