KA

ასვლა სამხრეთ უშბაზე - კლასიკური მარშრუტი

უშბას, ორთავიან მწვერვალს უწოდებენ. მისი ჩრდილოეთ მწვერვალის სიმაღლე 4690 მეტრია, ხოლო სამხრეთისა 4700 მეტრი. მწვერვალ სამხრეთ უშბაზე დამოუკიდებლად ასვლა მხოლოდ ძალიან გამოცდილი მთამსვლელებისთვისაა რეკომენდებული. ისინი, ვისაც მსგავსი გამოცდილება არ გააჩნიათ, უშბაზე მხოლოდ პროფესიონალ გამყოლთან ერთად უნდა ავიდნენ. მარშრუტის სირთულე - 5ბ.
რეგიონი
სამეგრელო-ზემო სვანეთი
ქალაქი
მესტია

უშბის მწვერვალის დახასიათება

უშბა მესტიის მუნიციპალიტეტში, ბეჩოს თემის სოფელ მაზერში, კავკასიონის მთავარი წყალგამყოფი ქედის პატარა შტოზე მდებარეობს.

უშბის სამხრეთ მწვერვალის სიმაღლე 4700  მეტრია და მისკენ მიმავალ მარშრუტზე გვხვდება ნაშალი ქვების რელიეფი, ყინულისა და თოვლის საფარი, ნაპრალოვანი ყინული, კლდოვანი ქედი.

პირველი დღე 

მარშრუტი სოფელ ბაგვდანარში იწყება, ზღვის დონიდან 1560 მეტრ სიმაღლეზე. აქედან სოფელ გულის გავლით პირველ საბანაკემდე მივდივართ, რომელიც ზღვის დონიდან 2900 მეტრზე, მწვანე საფარზე, მწვერვალ სამხრეთ უშბისა და მწვერვალ გულბის ძირში მდებარეობს. საბანაკესთან ახლოს არის წყალი. ასავლელი ვერტიკალი 1340 მეტრია, საჭირო დრო - 8-10 საათი.

მეორე დღე

პირველი საბანაკედან მეორე საბანაკესკენ თოკზე ჩაბმულები მივემართებით. ასავლელი ვერტიკალი 1200 მეტრია. საჭირო დრო - 6-8 საათი. მეორე საბანაკე 4100 მეტრ სიმაღლეზე, ურთულესი მონაკვეთის - „გასაღების“ ძირში მდებარეობს.

მესამე დღე 

გამთენიისას იწყება 150-მეტრიანი მთავარი ვერტიკალური კედლის გავლა. მწვერვალს 5ბ კატეგორიას სწორედ ეს კლდოვანი კედელი ანიჭებს. მთლიან მონაკვეთს ცოცვით გავდივართ. მთელი პროცესი ურთულეს სამუშაოს მოითხოვს თოკითა და აღჭურვილობით. კედლის გავლის შემდეგ მწვერვალისკენ მივუყვებით ალესილ ქედს, რომელსაც უკეთეს შემთხვევაში 2 საათში დავძლევთ. მწვერვალზე 5 წუთის დაყოვნების შემდეგ იმავე მარშრუტით მეორე საბანაკეში ვბრუნდებით. ასავლელი ვერტიკალი 600 მეტრია. საჭირო დრო - 6-7 საათი. 

მეოთხე დღე

მეორე საბანაკედან პირდაპირ სოფელ ბაგვდანარში ვეშვებით. უამინდობისა და გართულებული აკლიმატიზაციის შემთხვევაში შესაძლოა, დღეების რაოდენობა 1-2 დღით გაიზარდოს.

დამატებითი ინფორმაცია

სამხრეთ უშბაზე ასვლა რეკომენდებულია ივლისის შუა რიცხვებიდან აგვისტოს ბოლომდე.  

მესტიის ცენტრიდან მარშრუტის საწყის წერტილამდე 27 კმ-ია. ადგილზე მისასვლელად ნებისმიერი გამავლობის ავტომობილი გამოდგება. მისი დაქირავება მესტიის ავტოსადგურზეა შესაძლებელი.

ვებგვერდი იყენებს Cookies რათა გავაუმჯობესოთ მომხმარებელთა გამოცდილება.
Cookie პოლიტიკა