მარტვილში, სოფელ სალხინოში აშენებული სასახლე წარსულში დადიანების საზაფხულო რეზიდენცია იყო. სასახლისკენ საუკუნოვან ხეებს შორის მიმავალ ქვაფენილზევე იგრძნობ XIX საუკუნის ქართველი არისტოკრატების, საფრანგეთის საიმპერატორო ოჯახთან დანათესავებული თავადი დადიანების მთელ დიდებულებას.

სამეგრელოს ერთხელ მაინც თუ ეწვევი, აქ მიღებული გამოცდილება არასოდეს დაგავიწყდება. მარტვილის კანიონი სწორედ სამეგრელოში, მარტვილის მუნიციპალიტეტში მდებარეობს.

მსოფლიოს ცნობილი კანიონებისგან საქართველოს კანიონებს, უპირველეს ყოვლისა, ფერები განასხვავებს. მწვანედ შეფერილი აქ არა მხოლოდ მდინარეები, არამედ ტბები და მთებიც დაგხვდება.

მარტვილის კანიონი მდებარეობს მარტვილის მუნიციპალიტეტში, სოფელ გაჭედილში, ზღვის დონიდან 210 მეტრზე, მდინარე აბაშის ხეობაში. კანიონის სიგრძე 2400 მეტრია, აქ გვხვდება საფეხმავლო ბილიკები ეგზოტიკურ ბუნებაში, ჩანჩქერები, მდინარეები, ტბები და კლდეები. შეგიძლია ნავით გაისეირნო მდინარე აბაშაზე, 300-მეტრიან მონაკვეთზე და ასევე სხვადასხვა გასართობი და ექსტრემალური თავგადასავალი გამოცადო.

მარტვილი პატარა ქალაქია, რომელიც დასავლეთ საქართველოში, სამეგრელოს რეგიონში მდებარეობს. ეს ადგილი დიდი კულტურის კერაა, რასაც ორი სხვადასხვა ხასიათის ფაქტი მოწმობს: 1)ჭყონდიდის მონასტერში აღიზარდა საქართველოს ყველაზე ცნობილი, რეფორმატორი მეფე დავით აღმაშენებელი; 2) 1873 წელს პირველად აქ დაიდგა შექსპირის პიესა „ვენეციელი ვაჭარი“. ისტორია დუმს იმის შესახებ, სპექტაკლი ინგლისურ ენაზე იყო თუ ქართულად, მაგრამ თავად ეს გაურკვევლობაც კი აჩვენებს, რომ ევროპა მაშინაც არ იყო შორს.